જાહેર ક્ષેત્રની કંપની એન્જિનિયર્સ ઈન્ડિયા લિમિટેડ તેલ અને ગેસ સંબંધિત માળખાગત પ્રોજેક્ટ્સ માટે સાઉદી અરેબિયા અને સંયુક્ત આરબ અમીરાત (યુએઈ) સાથે પ્રારંભિક વાટાઘાટો કરી રહી છે.ઇઆઇએલ દ્વારા આ ચર્ચાઓનો હેતુ હોર્મુઝ સ્ટ્રેટ પર ગલ્ફ દેશોની નિર્ભરતા ઘટાડવાનો અને વૈકલ્પિક વિકલ્પો શોધવાનો છે. ઈરાન અને અમેરિકા વચ્ચે ચાલી રહેલા તણાવને કારણે હોર્મુઝ સ્ટ્રેટ દ્વારા શિપિંગ પર ગંભીર અસર પડી છે.
ઇઆઇએલના ચેરમેન અને મેનેજિંગ ડિરેક્ટર અતુલ ગુપ્તાએ કંપનીની પછી જણાવ્યું હતું કે સાઉદી અરેબિયા અને યુએઈ વૈકલ્પિક માર્ગો દ્વારા આંતરરાષ્ટ્રીય બજારોમાં ક્રૂડ ઓઇલ અને પેટ્રોલિયમ ઉત્પાદનોના પરિવહન માટે આશરે ૧ બિલિયનનું રોકાણ કરવાની યોજના બનાવી રહ્યા છે. આમાં પાઇપલાઇન્સ, સ્ટોરેજ સુવિધાઓ, તેલ ટર્મિનલ્સ અને અન્ય માળખાગત સુવિધાઓનો વિકાસ શામેલ હશે.
અતુલ ગુપ્તાએ કહ્યું, “તેઓ હાલમાં આયોજનના તબક્કામાં છે, અને અમે આ તબક્કે તેમની સાથે ચર્ચા પણ કરી રહ્યા છીએ.” એન્જિનિયર્સ ઈન્ડિયા આ પ્રોજેક્ટ્સ માટે પ્રોજેક્ટ કન્સલ્ટન્સી અને શક્યતા અભ્યાસ સુરક્ષિત કરવાનો પ્રયાસ કરી રહ્યું છે. ઈરાન-યુએસ સંઘર્ષને કારણે હોર્મુઝ સ્ટ્રેટ દ્વારા શિપિંગ પ્રભાવિત થયું છે. આ માર્ગ વિશ્વના મુખ્ય ઉર્જા પરિવહન માર્ગોમાંનો એક છે. લાંબા ગાળાના વિક્ષેપોના ભય વચ્ચે, ગલ્ફ તેલ ઉત્પાદક દેશો વૈકલ્પિક માળખાગત સુવિધાઓ અને નિકાસ માર્ગો વિકસાવવાનું વિચારી રહ્યા છે.
ઇઆઇએલના ચેરમેન ગુપ્તાએ જણાવ્યું હતું કે તણાવને કારણે પ્રદેશમાંથી નવા કરારોની ગતિ ધીમી પડી છે. જાકે, તેમણે આશા વ્યક્ત કરી હતી કે ત્રીજા અને ચોથા ક્વાર્ટરમાં કરાર જીતવાની ગતિ વધી શકે છે. તેમણે ઉમેર્યું હતું કે વર્તમાન પરિસ્થિતિએ કંપની માટે નવી તકો પણ ઉભી કરી છે. પશ્ચિમ એશિયામાં ઓર્ડરમાં મંદી ઇઆઇએલ માટે મહત્વપૂર્ણ છે, કારણ કે કંપનીના વિકાસમાં આંતરરાષ્ટ્રીય વ્યવસાયની ભૂમિકા સતત વધી રહી છે.
એન્જિનિયર્સ ઈન્ડિયાની કુલ ઓર્ડર બુકમાં વિદેશી પ્રોજેક્ટ્સનો હિસ્સો આશરે ૪૩% છે. નાણાકીય વર્ષ ૨૦૨૫-૨૬ માં કંપનીના નવા વ્યવસાયમાં આંતરરાષ્ટ્રીય કન્સલ્ટન્સી સેવાઓએ આશરે ૬૨% યોગદાન આપ્યું હતું, જે આશરે ૪,૯૨૯ કરોડ હતું. પશ્ચિમ એશિયામાં ઇઆઇએલની મજબૂત હાજરી છે. કંપની સાઉદી અરેબિયા,યુએઈ, બહેરીન અને કુવૈતમાં વિવિધ પ્રોજેક્ટ્સ અને વ્યવસાયિક પ્રવૃત્તિઓમાં સામેલ છે. તેણે સાઉદી અરેબિયામાં એક ઓફિસ પણ ખોલી છે.
