માફિયા અતીક અહેમદના પુત્ર અબાનના મૃત્યુ બાદ, ગુરુવારે રાત્રે મહારાણી લક્ષ્મીબાઈ ઝાંસી મેડિકલ કોલેજમાં ડોકટરોના એક પેનલે તેના શરીરનું પોસ્ટમોર્ટમ કર્યું. તેના શરીર પર ૨૩ ઇજાઓ મળી આવી. ડોકટરોએ તેનું મૃત્યુ વધુ પડતા આંતરિક રક્તસ્ત્રાવને કારણે થયું હોવાનું જણાવ્યું છે.
ગંભીર ઇજાથી તેનું લીવર અને ફેફસાં ફાટી ગયા, તેની બરોળને નુકસાન થયું અને તેની પાંસળીઓમાં ફ્રેક્ચર થયું. આના કારણે વધુ પડતું આંતરિક રક્તસ્ત્રાવ થયું, જેના કારણે તેનું મૃત્યુ થયું. અબાનના સાથી, સોનુ, જેને શાકીર તરીકે પણ ઓળખવામાં આવે છે, તેનું પણ અકસ્માતમાં મૃત્યુ થયું. તેના બંને હાથ અને ખોપરીમાં ફ્રેક્ચર થયું.
ડા. પંકજ મુસ્તારિયા, ડા. ઝિયા ઝફર અને ડા. રજનીશ યાદવના પેનલે બંને મૃતદેહોનું પોસ્ટમોર્ટમ પરીક્ષણ કર્યું, જે લગભગ ૪ઃ૩૦ કલાક ચાલ્યું. બંનેનું અકસ્માતમાં ગંભીર ઇજાઓથી મૃત્યુ થયું.
પોસ્ટમોર્ટમ પછી, પરિવાર મોડી રાત્રે મૃતદેહો સાથે પ્રયાગરાજ જવા રવાના થયો. અબાનના મૃતદેહને શુક્રવારે પ્રયાગરાજમાં તેના પૈતૃક ગામ, કસારી મસારીમાં કબ્રસ્તાનમાં દફનાવવામાં આવશે.
અબાન ગુરુવારે સવારે લગભગ ૫ વાગ્યે ઝાંસી જેલમાં બંધ તેના મોટા ભાઈ અલીને મળવા માટે પ્રયાગરાજથી રવાના થયો. તેની સાથે ક્રેટા કારમાં ચાર મિત્રો હતા. ઝાંસીથી લગભગ ૭૦ કિલોમીટર દૂર પૂંછ પોલીસ સ્ટેશન વિસ્તારમાં ખિલી ગામ પાસે સવારે ૧૦ઃ૩૦ વાગ્યે એક ઝડપી કાર ડિવાઇડર સાથે અથડાઈ હતી.
ઉત્તર પ્રદેશના ઝાંસી જિલ્લાના પૂંછ પોલીસ સ્ટેશન વિસ્તારમાં ખિલી ગામ નજીક થયેલા ભયાનક માર્ગ અકસ્માત બાદ, કારમાં સવાર લોકોની ઓળખ પોલીસ માટે એક મોટો પડકાર ઉભો થયો હતો. લગભગ એક કલાક સુધી, પોલીસે મૃતકો અને ઘાયલોની ઓળખ કરવામાં સંઘર્ષ કર્યો. ટેકનિકલ પુરાવા, ડ્રાઇવરની પૂછપરછ અને કારમાંથી મળેલા સંકેતોના આધારે, મૃતકની ઓળખ આખરે માફિયા નેતા અતીક અહેમદના પુત્ર અબાન અહેમદ તરીકે થઈ.
અકસ્માત પછી, ઘાયલ ડ્રાઇવર, મોહમ્મદ ઝૈદને મોન્થા કોમ્યુનિટી હેલ્થ સેન્ટરમાં લઈ જવામાં આવ્યો હતો. તે ભાનમાં હતો, પરંતુ પૂછપરછ દરમિયાન વારંવાર અલગ અલગ માહિતી આપતો હતો. આનાથી શરૂઆતની તપાસમાં મૂંઝવણ ઊભી થઈ. જાકે, તે તેના ભાઈ વિશે પૂછતો રહ્યો અને તેની તબિયત વિશે પૂછપરછ કરવાનો પ્રયાસ કરતો રહ્યો.
કારના પાછળના કાચને કારણે, લોકોએ શરૂઆતમાં ધાર્યું હતું કે કોઈ સૈન્ય સૈનિક અથવા તેના પરિવારનો સભ્ય વાહનમાં મુસાફરી કરી રહ્યો છે. જોકે, જેમ જેમ તપાસ આગળ વધતી ગઈ, તેમ તેમ આ ધારણા ખોટી સાબિત થઈ, અને કારમાં સવાર લોકોની સાચી ઓળખ બહાર આવવા લાગી.
મૃતકનો ચહેરો ગંભીર રીતે ક્ષતિગ્રસ્ત હતો, જેના કારણે તાત્કાલિક ઓળખ થઈ શકી નહીં. ત્યારબાદ પોલીસે ડિજિટલ ફોટો મેચિંગ હાથ ધર્યું. સોશિયલ મીડિયા પ્રોફાઇલ અને અન્ય ટેકનિકલ ડેટાની પણ તપાસ કરવામાં આવી. તમામ હકીકતો એકત્રિત કર્યા પછી, લગભગ એક કલાકમાં ઓળખની પુષ્ટિ થઈ. પૂછપરછ દરમિયાન, મોહમ્મદ ઝૈદે ખુલાસો કર્યો કે અબાન અહેમદ પણ તેની સાથે કારમાં હતો અને આગળની સીટ પર બેઠો હતો. જાકે તેના બદલાતા નિવેદનોથી તપાસમાં અવરોધ આવ્યો, પરંતુ તેના ઇનપુટથી પાછળથી પોલીસને યોગ્ય દિશા નિર્દેશ કરવામાં મદદ મળી.
