આઇસીસી ટી ૨૦ વર્લ્ડ કપ ૨૦૨૬ માં ભારત અને પાકિસ્તાન વચ્ચેનો ભવ્ય મુકાબલો એક સમયે ગંભીર મુશ્કેલીમાં મુકાયો હતો. ૧૫ ફેબ્રુઆરીએ કોલંબોના આર. પ્રેમદાસા સ્ટેડિયમમાં રમાનારી આ મેચ અંગે પરિસ્થિતિ એટલી બગડી ગઈ હતી કે પાકિસ્તાને મેચ રમવાનો ઇનકાર કરી દીધો હતો. આનું કારણ પાકિસ્તાન સરકાર દ્વારા જારી કરાયેલા નિર્દેશો તરીકે દર્શાવવામાં આવ્યું હતું. જાકે, થોડા સમય પછી, પાકિસ્તાન ક્રિકેટ બોર્ડે યુ-ટર્ન લીધો અને એક નિવેદન બહાર પાડ્યું જેમાં કહેવામાં આવ્યું હતું કે તે ઇન્ડિયા વિરુદ્ધ પાકિસ્તાન મેચ રમવા માટે તૈયાર છે. પરંતુ હવે આ સમગ્ર ઘટનાનું સત્ય સામે આવી ગયું છે.
અહેવાલ મુજબ,પીસીબીના અધ્યક્ષ મોહસીન નકવીએ બાંગ્લાદેશ ક્રિકેટ બોર્ડના પ્રમુખ અમીનુલ ઇસ્લામને વિનંતી કરી કે તેઓ પાકિસ્તાનને ભારત સામે મેચ રમવા માટે ઔપચારિક રીતે વિનંતી કરે. અહેવાલમાં સૂત્રોને ટાંકીને જણાવાયું છે કે નકવીએ અમીનુલ ઇસ્લામનો સંપર્ક કર્યો અને આ વિનંતી કરી જેથી પાકિસ્તાન આ વિવાદાસ્પદ પરિસ્થિતિમાંથી સન્માનજનક રીતે બહાર નીકળી શકે.
બીસીબીના પ્રમુખ અમીનુલ ઇસ્લામે તેમના સત્તાવાર નિવેદનમાં પુષ્ટિ આપી કે તેમણે પાકિસ્તાનને ભારત સામે મેચ રમવા માટે વિનંતી કરી હતી. તેમણે જણાવ્યું હતું કે પાકિસ્તાનની મુલાકાત પછી અને તેમની ચર્ચાઓના સંભવિત પરિણામોને ધ્યાનમાં લીધા પછી, તેમણે સમગ્ર ક્રિકેટ જગતના હિતમાં ૧૫ ફેબ્રુઆરીએ ભારત સામે આઇસીસી ટી ૨૦ વર્લ્ડ કપ મેચ રમવા માટે પાકિસ્તાનને વિનંતી કરી હતી. આ નિવેદનથી સ્પષ્ટ થયું કે પડદા પાછળ, ઘણા ક્રિકેટ બોર્ડ મેચ બચાવવાનો પ્રયાસ કરી રહ્યા હતા.
ભારત-પાકિસ્તાન મેચનો બહિષ્કાર કરવાથી શ્રીલંકાને સૌથી વધુ નુકસાન થઈ શકયું હોત. રદ થવાથી નોંધપાત્ર નાણાકીય નુકસાન થયું હોત. આ કારણોસર, શ્રીલંકા ક્રિકેટ અને સરકાર પાકિસ્તાનને મેચનો બહિષ્કાર ન કરવા માટે સતત અપીલ કરી રહી હતી. પાકિસ્તાને મેચ રમવા માટે સંમતિ આપ્યા પછી, શ્રીલંકાના રાષ્ટ્રપતિ અનુઆર કુમારા દિસાનાયકે જાહેરમાં પાકિસ્તાનના વડા પ્રધાન શાહબાઝ શરીફનો આભાર માન્યો.
તેમણે એકસ પર લખ્યું “ક્રિકેટની આ પ્રિય રમત ચાલુ રહે તે સુનિશ્ચિત કરવા બદલ વડા પ્રધાન શાહબાઝ શરીફનો આભાર. મને એ જાણીને આનંદ થયો કે કોલંબોમાં ચાલી રહેલા ટી ૨૦ વર્લ્ડ કપમાં બહુપ્રતિક્ષિત ભારત-પાકિસ્તાન મેચ સમયપત્રક પર થશે.” સહ-યજમાન તરીકે શ્રીલંકા,આઇસીસી અને તમામ સંબંધિત પક્ષોના પ્રયાસોની પ્રશંસા કરે છે.
