ભારત અને અમેરિકાએ પરમાણુ સહયોગ વધારવા માટે એક મહત્વપૂર્ણ બેઠક યોજી હતી. યુએસ ઉર્જા સચિવ ક્રિસ રાઈટ સાથેની બેઠકમાં, ભારતીય વિદેશ સચિવ વિક્રમ મિશ્રીએ પરમાણુ ઊર્જા, કોલસા ગેસિફિકેશન અને એલપીજી નિકાસ જેવા નવા ક્ષેત્રોમાં ઊર્જા સહયોગ વધારવા અંગે ચર્ચા કરી. ભારતીય દૂતાવાસે સોશિયલ મીડિયા પર જાહેરાત કરી હતી કે મિસ્ત્રી અને રાઈટ વચ્ચેની ચર્ચા “ઊર્જા સુરક્ષા વધારવા, દ્વિપક્ષીય ઊર્જા વેપારને ગાઢ બનાવવા અને ભારત-અમેરિકન ઊર્જા ભાગીદારીને મજબૂત બનાવવા માટે નવા માર્ગો શોધવા” પર કેન્દ્રિત હતી.
ભારતમાં યુએસ રાજદૂત સેરગેઈ ગોર, જે બેઠકમાં હાજર હતા, તેમણે કહ્યું કે યુએસ નાગરિક પરમાણુ સહયોગ ઉપરાંત કોલસા ગેસિફિકેશન અને યુએસ એલપીજી નિકાસ જેવા અન્ય ક્ષેત્રોમાં ભારત સાથે સહયોગ કરવા તૈયાર છે. રાજદૂત ગોરે એક સોશિયલ મીડિયા પોસ્ટમાં લખ્યું, “આજે સવારે ક્રિસ રાઈટ અને વિદેશ સચિવ વિક્રમ મિશ્રી સાથે યુએસ-ભારત ઊર્જા સહયોગના ભવિષ્ય વિશે ચર્ચા કરવી ખૂબ જ સારી રહી. ભારત દ્વારા શાંતિ બિલ પસાર થયા બાદ, અમે કોલસા ગેસિફિકેશન અને યુએસ એલપીજી નિકાસ સહિત નાગરિક પરમાણુ સહયોગ પર સહયોગ કરવા તૈયાર છીએ.” રાત્રે, તેમણે ફ્લોરિડામાં યુએસ રાષ્ટીયપતિ ડોનાલ્ડ ટ્રમ્પના માર-એ-લાગો રિસોર્ટમાં વિક્રમ મિશ્રીનું સ્વાગત કર્યું.
યુએસ એમ્બેસેડર ગોરે સોશિયલ મીડિયા પર લખ્યું, “આજે રાત્રે માર-એ-લાગોમાં ભારતના વિદેશ સચિવ વિક્રમ મિસ્ત્રીનું સ્વાગત કરવું એ એક લહાવો હતો! ભારત અને યુનાઇટેડ સ્ટેટ્સ આગામી મહિનાઓ અને વર્ષોમાં વેપારથી લઈને સંરક્ષણ અને ઉર્જા સુધીના તમામ ક્ષેત્રોમાં સાથે મળીને કામ કરવા આતુર છે.”
સસ્ટેનેબલ હાર્નેસિંગ એન્ડ એડવાન્સમેન્ટ ઓફ ન્યુક્લયર એનર્જી એક્ટ (શાંતિ કાયદો) ને ભારતના નાગરિક પરમાણુ ક્ષેત્ર માટે અત્યાર સુધીનો સૌથી વ્યાપક સુધારો માનવામાં આવે છે. ગયા ડિસેમ્બરમાં લાગુ કરાયેલા આ કાયદાએ કડક રીતે નિયંત્રિત નાગરિક પરમાણુ ક્ષેત્રને ખાનગી ક્ષેત્રની ભાગીદારી માટે ખોલ્યું. તેણે ૧૯૬૨ ના પરમાણુ ઊર્જા કાયદા અને ૨૦૧૦ ના નાગરિક જવાબદારી માટે પરમાણુ નુકસાન કાયદાને પણ રદ કર્યો. વિદેશ સચિવ વિક્રમ મિસ્ત્રી મંગળવારે મોડી રાત્રે યુએસ પહોંચ્યા અને ત્રણ દિવસની મુલાકાતે છે. તેમણે સંરક્ષણ, વાણિજ્ય અને રાજ્ય વિભાગના વરિષ્ઠ અધિકારીઓ સાથે મુલાકાત કરી છે. તેમણે બુધવારે રાજ્ય સચિવ માર્કો રુબિયો સાથે પણ મુલાકાત કરી.
