બગસરા શહેરમાં પાડોશી અથવા પરિચિત (સામાવાળા) દ્વારા સતત આપવામાં આવતી ગાળો અને માનસિક ત્રાસથી કંટાળીને એક વ્યક્તિએ ફિનાઈલ પીને આત્મહત્યાનો પ્રયાસ કર્યો હોવાની ઘટના સામે આવી હતી. હાલ ભોગ બનનારને તાત્કાલિક સારવાર અર્થે હોસ્પિટલ ખસેડવામાં આવ્યા છે. વિલાસબેન વિજયભાઇ પરમાર (ઉ.વ.૩૨)એ નયનાબેન રમેશભાઇ મારૂ સામે ફરિયાદ નોંધાવી હતી. જે મુજબ, બગસરામાં રહેતા ફરિયાદીને આ કામના સામાવાળા પક્ષ દ્વારા છેલ્લા છ મહિનાથી સતત ગાળો આપી હેરાન કરવામાં આવતા હતા. ગત તારીખ ૨૬/૦૧/૨૦૨૬ના રોજ જ્યારે ફરિયાદી પોતાના ઘરે હાજર હતા, ત્યારે સામાવાળાએ ફરી એકવાર ઘર પાસે આવીને જાહેરમાં બિભત્સ ગાળો આપી હતી. સામાવાળાની આ ‘ભુંડાબોલી’ ગાળો અને સતત થઈ રહેલા અપમાનથી કંટાળીને ફરિયાદીએ અત્યંત ક્ષોભજનક સ્થિતિમાં આવી પોતાના ઘરે પડેલી ફિનાઈલની બોટલમાંથી ફિનાઈલ પી લીધું હતું. ઘટનાને પગલે પરિવારજનોમાં દોડધામ મચી ગઈ હતી અને તેમને તાત્કાલિક સારવાર માટે હોસ્પિટલમાં દાખલ કરવામાં આવ્યા હતા. બગસરા પોલીસ સ્ટેશનના પી.ડી. કલસરીયા વધુ તપાસ કરી રહ્યા છે.
