અજીત અગરકરનો મુખ્ય પસંદગીકાર તરીકેનો કાર્યકાળ પૂર્ણ થયા બાદ પસંદગી સમિતિમાં ખાલી જગ્યા ઉભી થયા બાદ ભારતીય ક્રિકેટ નિયંત્રણ બોર્ડ નવા પસંદગીકારની શોધ કરી રહ્યું છે. હાલમાં, અગરકરના ગયા પછી બાકીના પસંદગીકારોમાં સૌથી વરિષ્ઠ પ્રજ્ઞાન ઓઝા વચગાળાના ધોરણે મુખ્ય પસંદગીકાર પદ સંભાળી રહ્યા છે. એવી આશા હતી કે તેઓ પૂર્ણ-સમય આ પદ પર રહેશે, પરંતુ હવે તેની શક્યતા ઓછી દેખાઈ રહી છે. આ પાછળનું મુખ્ય કારણ ટીમ ઇન્ડિયાના ભૂતપૂર્વ ખેલાડી વસીમ જાફરે મુખ્ય પસંદગીકાર પદ માટે અરજી કરી છે, જેમણે કુલ ૩૧ ટેસ્ટ મેચ રમી છે.
ટીમ ઇન્ડિયાના ભૂતપૂર્વ ઓપનિંગ બેટ્સમેન વસીમ જાફરે ભારતીય ક્રિકેટ ટીમના મુખ્ય પસંદગીકાર પદ માટે અરજી કરી છે. સમાચાર એજન્સી પીટીઆઈને આપેલા નિવેદનમાં, વસીમ જાફરે પુષ્ટિ આપી, “હા, મેં આ પદ માટે અરજી કરી છે.” હાલમાં ૪૮ વર્ષના જાફરે ટીમ ઇન્ડિયા માટે ૩૧ ટેસ્ટ મેચ રમી છે અને તેમાં લગભગ ૨,૦૦૦ રન બનાવવામાં સફળ રહ્યા છે. જા અશોક મલ્હોત્રા અને જતીન પરાંજપેની બનેલી ક્રિકેટ સલાહકાર સમિતિ વસીમ જાફરને પસંદ કરે છે, તો તે ચેરમેન પદ માટે વિચારણા હેઠળના ઉમેદવારોમાં સૌથી વધુ ટેસ્ટ મેચ રમ્યાનો રેકોર્ડ ધરાવશે. જાફરે ૩૧ ટેસ્ટ રમી છે, જે ભારત માટે ૨૪ ટેસ્ટ રમી ચૂકેલા પ્રજ્ઞાન ઓઝા કરતા વધુ છે. વર્તમાન પસંદગી પ્રક્રિયા હેઠળ, સૌથી વધુ ટેસ્ટ મેચ રમનાર પ્રદેશના પ્રતિનિધિને ચેરમેન પદ માટે દાવેદાર માનવામાં આવે છે.
જ્યારે વસીમ જાફરની અરજીથી ટીમ ઇન્ડિયાના મુખ્ય પસંદગીકાર માટે દોડ વધુ તીવ્ર બની છે, ત્યારે એવું માનવામાં આવે છે કે પ્રજ્ઞાન ઓઝાને ચેરમેન પદે રહેવા માટે મજબૂત સમર્થન છે, કારણ કે જાફરના આગમનથી નવી પસંદગી સમિતિની રચના પર અસર પડી શકે છે. આવી સ્થિતિમાં, ટીમ ઇન્ડિયાના ભૂતપૂર્વ સ્પિન બોલર રમેશ પોવાર પણ પસંદગી સમિતિમાં સ્થાન મેળવવાની દોડમાં હોઈ શકે છે. તે પશ્ચિમ ક્ષેત્રનું પ્રતિનિધિત્વ કરી શકે છે, જ્યાં પોવાર ટીમ ઇન્ડિયા માટે બે ટેસ્ટ મેચ રમી ચુક્યા છે.
