ભૂતપૂર્વ ક્રિકેટર અને રાજ્યસભા સાંસદ હરભજન સિંહના એક વીડિયોને લઈને પંજાબનું રાજકારણ ગરમાયું છે. આમ આદમી પાર્ટીના મુખ્ય પ્રવક્તા બલતેજ પન્નુએ હરભજન સિંહ પર નિશાન સાધ્યું છે. તેમણે આરોપ લગાવ્યો છે કે પંજાબનો એક વીડિયો સોશિયલ મીડિયા પર શેર કરવામાં આવ્યો હતો, જેમાં દાવો કરવામાં આવ્યો હતો કે તે રાજસ્થાનનો છે. બલતેજ પન્નુએ કહ્યું કે તપાસ વિના વીડિયો પોસ્ટ કરીને પંજાબ પોલીસ પર પ્રશ્નો ઉભા કરવામાં આવ્યા છે અને આ પંજાબને બદનામ કરવાનો પ્રયાસ હતો.
બલતેજ પન્નુએ કહ્યું કે પોલીસ હરભજન સિંહ સહિત વીડિયો પોસ્ટ કરનારા દરેક વ્યક્તિનો ડેટા એકત્રિત કરી રહી છે. આ પછી આગળની કાયદેસરની કાર્યવાહી કરવામાં આવશે. તેમણે આરોપ લગાવ્યો કે ભાજપમાં જાડાયેલા કેટલાક સાંસદો પંજાબને બદનામ કરી રહ્યા છે. તેમણે કહ્યું કે ડ્રગ્સ એક વૈશ્વિક સમસ્યા છે. અમેરિકાએ ડ્રગ્સ વિરુદ્ધ ઓપરેશન હાર્ડબોલ પણ શરૂ કર્યું.
બલતેજ પન્નુએ ગુજરાતના મુન્દ્રા પોર્ટનો પણ ઉલ્લેખ કર્યો. તેમણે આરોપ લગાવ્યો કે ગુજરાતના મુન્દ્રા પોર્ટ પર મોટી માત્રામાં ડ્રગ્સ આવી રહ્યું છે. તેમણે કહ્યું કે પંજાબ પોલીસે “ડ્રગ્સ વિરુદ્ધ યુદ્ધ” નામનું ડ્રગ્સ વિરુદ્ધ અભિયાન શરૂ કર્યું છે, પરંતુ આ અભિયાનને સફળ થતું અટકાવવા માટે લોકોને ગેરમાર્ગે દોરવામાં આવી રહ્યા છે.
પન્નુએ કહ્યું કે હરભજન સિંહ ભૂતપૂર્વ ક્રિકેટર અને રાજ્યસભા સાંસદ છે. તેમણે પંજાબના લોકો સાથે દગો કર્યો અને ભાજપમાં જાડાયા. આજે પરિસ્થિતિ એવી છે કે તેઓ ભાજપ તેમને જે કંઈ કહે છે, અથવા તેમને જે કંઈ સામગ્રી આપવામાં આવે છે તે સોશિયલ મીડિયા પર પોસ્ટ કરી રહ્યા છે. અન્ય ઘણી હસ્તીઓએ પણ આ વીડિયો પોસ્ટ કર્યો છે.
બલતેજ પન્નુએ કહ્યું કે તેમણે એક એવો જ વીડિયો પોસ્ટ કર્યો છે, જે પંજાબનો નહીં પણ રાજસ્થાનનો છે. કોઈપણ તપાસ વિના, આ વીડિયો પંજાબનો હોવાનો દાવો કરવામાં આવ્યો હતો, જેનાથી પંજાબ પોલીસ પર સવાલો ઉભા થયા હતા. પન્નુએ કહ્યું કે આ બધું પંજાબને બદનામ કરવા માટે કરવામાં આવી રહ્યું છે. હરભજન સિંહ અગાઉ આમ આદમી પાર્ટીના રાજ્યસભા સાંસદ હતા, પરંતુ રાઘવ ચઢ્ઢાના નેતૃત્વમાં પાર્ટીમાં વિભાજન થયા બાદ તેઓ ભાજપમાં જાડાયા. જ્યારે પંજાબ પોલીસે ડ્રગ્સના દૂષણને કાબુમાં લેવા માટે ડ્રગ્સ સામે યુદ્ધ શરૂ કર્યું છે, ત્યારે આ અભિયાનને જમીની સફળતા પ્રાપ્ત કરવામાં સમય લાગશે.
