ટી ૨૦ વર્લ્ડ કપમાં, પાકિસ્તાની ટીમ સેમિફાઇનલમાં પહોંચવાની અપેક્ષા હતી. જાકે, તેમનું પ્રદર્શન એટલું નિરાશાજનક હતું કે તેમની સફર સુપર ૮ મેચો સાથે સમાપ્ત થઈ. ઘરે પરત ફર્યા બાદ,પીસીબીએ બધા પાકિસ્તાની ખેલાડીઓને તેમના ખરાબ પ્રદર્શન બદલ દંડ ફટકાર્યો. હવે, એક સમાચાર સામે આવ્યા છે જેણે બધાને ચોંકાવી દીધા છે. ટી ૨૦ વર્લ્ડ કપ દરમિયાન, પાકિસ્તાની ટીમ શ્રીલંકાના કેન્ડીમાં ગોલ્ડન ક્રાઉન હોટેલમાં રોકાઈ હતી, જ્યાં એક પાકિસ્તાની ખેલાડી પર હોટલ કર્મચારી સાથે છેડતી કરવાનો આરોપ મૂકવામાં આવ્યો હતો.
પાકિસ્તાની ટીમે ૨૦૨૬ ના ટી ૨૦ વર્લ્ડ કપમાં તેમની બધી મેચ કોલંબો અને શ્રીલંકાના કેન્ડીમાં રમી હતી. તેઓએ તેમની છેલ્લી બે સુપર ૮ મેચ કેન્ડીના પલ્લેકેલે સ્ટેડિયમમાં રમી હતી, જ્યાં પાકિસ્તાની ટીમ ગોલ્ડન ક્રાઉન હોટેલમાં રોકાઈ હતી. ટેલિકોમ એશિયા સ્પોર્ટના અહેવાલ મુજબ, શ્રીલંકા સામે પાકિસ્તાનની સુપર ૮ મેચ પહેલા, એક ખેલાડીએ મહિલા હાઉસકીપિંગ સ્ટાફ સભ્ય સાથે ગેરવર્તન કર્યું. ત્યારબાદ મહિલા કર્મચારીએ મદદ માટે ચીસો પાડી, જેના કારણે હોટેલ સ્ટાફ તેના બચાવ માટે દોડી ગયો.
મહિલા કર્મચારીની ચીસો પછી, પાકિસ્તાન ટીમ મેનેજર નવીદ ચીમા ઘટનાસ્થળે પહોંચ્યા, તેમણે તેમના ખેલાડીના અયોગ્ય વર્તન માટે હોટેલ મેનેજમેન્ટ પાસે માફી માંગી, અને ખેલાડીને તેના ગેરવર્તણૂક બદલ દંડ પણ ફટકાર્યો. આ અહેવાલ સામે આવ્યા પછી,પીસીબીએ હજુ સુધી કોઈ સત્તાવાર નિવેદન બહાર પાડ્યું નથી, કે ખેલાડીનું નામ જાહેર કરવામાં આવ્યું નથી.
ટી ૨૦ વર્લ્ડ કપ ૨૦૨૬ ના ગ્રુપ સ્ટેજમાં ભારતીય ટીમ સામે એકતરફી હારનો સામનો કર્યા બાદ પાકિસ્તાન ટીમને ઘણી ટીકાઓનો સામનો કરવો પડ્યો હતો. ત્યારબાદ તેઓ સુપર આઠ માટે ક્વોલિફાય થયા હતા પરંતુ માત્ર એક જ મેચ જીતી શક્્યા હતા. ન્યૂઝીલેન્ડ સામે નબળા નેટ રન રેટને કારણે સુપર આઠમાં તેમની સફરનો અંત આવ્યો. ઘરે પરત ફર્યા પછી,પીસીબીએ ટીમમાં દરેક પાકિસ્તાની ખેલાડી માટે ૫ મિલિયન (આશરે ૫ મિલિયન) નો દંડ જાહેર કર્યો.
