ભાગેડુ ભારતીય હીરા વેપારી નીરવ મોદીને બ્રિટિશ કોર્ટ તરફથી મોટો ઝટકો લાગ્યો છે. હાઈકોર્ટના આદેશ બાદ, નીરવ મોદીને હવે બેંક છેતરપિંડી કેસમાં ૧૦૦ કરોડથી વધુ રકમ ચૂકવવી પડશે. હાઈકોર્ટના ન્યાયાધીશ સિમોન ટિંકલરે નીરવ મોદીને વ્યક્તિગત ગેરંટી હેઠળ દેવાદાર જાહેર કર્યો. અહેવાલો અનુસાર, નીરવ મોદી પર ૪.૧ મિલિયન (આશરે ૩૮.૯ કરોડ) ની મૂળ રકમ બાકી છે. બેંક આ રકમમાં નિર્ધારિત વ્યાજ પણ ઉમેરશે.
અહેવાલો અનુસાર હાઈકોર્ટની સુનાવણી દરમિયાન નીરવ કે તેના વકીલે પોતાના બચાવમાં કોઈ સ્પષ્ટતા આપી ન હતી. નીરવે દલીલ કરી હતી કે ગેરંટી અમલમાં મૂકી શકાય તેવી નથી અને તેને બેંક તરફથી ક્્યારેય માન્ય માંગણીઓ મળી નથી. બેંક ઓફ ઇન્ડિયાએ જુલાઈ ૨૦૧૨ માં દુબઈમાં નીરવની કંપની, ફાયરસ્ટાર ડાયમંડ એફઝેડઇને લોન આપી હતી. નીરવે ૩ ઓગસ્ટ, ૨૦૧૩ ના રોજ વ્યક્તિગત ગેરંટી આપી હતી.
૨૦૧૮ ની શરૂઆતમાં, જ્યારે નીરવ મોદી દ્વારા પંજાબ નેશનલ બેંકમાં કથિત છેતરપિંડીના સમાચાર ફેલાતા, બેંક ઓફ ઇન્ડિયાએ ચુકવણી માંગવાનો નિર્ણય લીધો. માર્ચ અને એપ્રિલ ૨૦૧૮ માં ફાયરસ્ટાર અને નીરવ મોદીને મોકલવામાં આવેલી નોટિસનો કોઈ જવાબ મળ્યો નહીં. ૮ માર્ચ, ૨૦૨૪ ના રોજ, બેંક ઓફ ઇન્ડિયાએ ૪.૧ મિલિયન ડોલરના મુદ્દલ અને વ્યાજ માટે સારાંશ ચુકાદો મેળવ્યો. બેંકે ઓક્ટોબર ૨૦૨૫ માં નીરવ મોદીને બીજી માંગ મોકલી. ન્યાયાધીશ ટિંકલરે જણાવ્યું કે ફેબ્રુઆરી ૨૦૧૮ થી ફાયરસ્ટાર ગ્રુપની દરેક કંપની પ્રભાવિત થઈ છે.
જજ ટિંકલરે સમજાવ્યું કે ૧૭ ફેબ્રુઆરી, ૨૦૧૮ ના રોજ, નીરવે બેંકને એક ઇમેઇલ મોકલ્યો. તેમાં, તેમણે મીડિયાના પ્રચારને કારણે કામગીરી બંધ થવાનો ઉલ્લેખ કર્યો. તેમણે જૂથની બેંકોનું દેવું ચૂકવવામાં
અસમર્થતા પણ જણાવી. નીરવે એપ્રિલ ૨૦૧૮ અને ઓક્ટોબર ૨૦૨૫ ની માંગણીઓ પ્રાપ્ત કરવાનો ઇનકાર કર્યો હતો. જોકે, ટિંકલર સંતુષ્ટ હતા કે તેમને બંને માંગણીઓ મળી ગઈ છે અને તેમણે ગેરંટીઓ લાગુ કરવા યોગ્ય હોવાનું માન્યું.
