કથિત પાસપોર્ટ વિવાદને લઈને આસામમાં રાજકીય વાતાવરણ ગરમાઈ રહ્યું છે. દરમિયાન, આસામ પોલીસ ક્રાઈમ બ્રાન્ચે કોંગ્રેસના સાંસદ રણદીપ સિંહ સુરજેવાલાને સમન્સ જારી કર્યું છે. પોલીસે તેમને ૨૩ મેના રોજ ગુવાહાટીના ક્રાઈમ બ્રાન્ચ પોલીસ સ્ટેશનમાં હાજર થવા જણાવ્યું છે. આ કેસ આસામના મુખ્યમંત્રી હિમંત બિસ્વા શર્માની પત્ની રિંકી ભૂયાન શર્મા સાથે સંકળાયેલા કથિત પાસપોર્ટ વિવાદ સાથે સંબંધિત હોવાનું કહેવાય છે. જોકે પોલીસે હજુ સુધી કેસના તમામ પાસાઓ જાહેરમાં જાહેર કર્યા નથી, તપાસ એજન્સીઓ તેને ગંભીરતાથી લઈ રહી છે.
સૂત્રોના જણાવ્યા અનુસાર, પૂછપરછ દરમિયાન કોંગ્રેસ નેતા પવન ખેરાએ કથિત રીતે આ કેસમાં સુરજેવાલાનું નામ લીધું હતું. આ પછી, તપાસ એજન્સીઓએ આ કેસમાં ઊંડાણપૂર્વક તપાસ શરૂ કરી છે. તેઓ એ પણ તપાસ કરી રહ્યા છે કે ગૌરવ ગોગોઈ અને રણદીપ સિંહ સુરજેવાલા કથિત રીતે આ વિવાદ સાથે સંકળાયેલા મોટા કાવતરાની યોજનામાં સામેલ હતા કે નહીં. આસામ પોલીસ કહે છે કે તમામ પાસાઓની તપાસ કરવામાં આવી રહી છે અને હકીકતોના આધારે આગળની કાર્યવાહી કરવામાં આવશે.
હકીકતમાં, આસામ વિધાનસભા ચૂંટણી પહેલા રાષ્ટ્રીય રાજધાની દિલ્હીમાં એક પ્રેસ કોન્ફરન્સ દરમિયાન, કોંગ્રેસ નેતા પવન ખેરાએ આરોપ લગાવ્યો હતો કે મુખ્યમંત્રી શર્માની પત્ની પાસે ત્રણ દેશોના પાસપોર્ટ છેઃ યુએઈ, એન્ટીગુઆ અને ઇજિપ્ત. તેમણે એવો પણ દાવો કર્યો હતો કે દુબઈમાં મિલકતો સહિત કેટલીક વિદેશી સંપત્તિઓ સત્તાવાર ફાઇલિંગમાં જાહેર કરવામાં આવી નથી. તેમણે એવો પણ આરોપ લગાવ્યો હતો કે યુનાઇટેડ સ્ટેટ્સના વ્યોમિંગમાં નોંધાયેલ એક કંપની શર્મા સાથે જોડાયેલી છે અને હજારો કરોડ ડોલરના નાણાકીય વ્યવહારો સાથે સંકળાયેલી છે. કોંગ્રેસ નેતાએ આ મામલાને કથિત સંપત્તિ છુપાવવાનો કેસ ગણાવ્યો અને કેન્દ્રીય ગૃહ મંત્રાલય પાસેથી વિશેષ તપાસ ટીમ તપાસની માંગ કરી. આ નિવેદન બાદ, તેમની સામે ગુવાહાટી ક્રાઈમ બ્રાન્ચ પોલીસ સ્ટેશનમાં એફઆઇઆર નોંધવામાં આવી હતી.એફઆઇઆરમાં ભારતીય દંડ સંહિતાની અનેક કલમોનો આરોપ મૂકવામાં આવ્યો છે, જેમાં ચૂંટણી સંબંધિત ખોટા નિવેદનો આપવા, છેતરપિંડી, બનાવટી, બદનક્ષી અને શાંતિ ખલેલ પહોંચાડવાનો સમાવેશ થાય છે.
જોકે, રિંકી ભૂયાન શર્માએ આ બધા આરોપોને સ્પષ્ટપણે નકારી કાઢ્યા છે, તેમને પાયાવિહોણા અને દુર્ભાવનાપૂર્ણ ગણાવ્યા છે. તેમણે વધુમાં આરોપ લગાવ્યો છે કે પ્રેસ કોન્ફરન્સ દરમિયાન બતાવેલા દસ્તાવેજા બનાવટી હતા, જેમાં સરકારી રેકોર્ડ જેવા દેખાતા બનાવટી સીલ અને ઊઇ કોડ બનાવવામાં આવ્યા હતા.
સુપ્રીમ કોર્ટે એ પણ સ્પષ્ટ કર્યું હતું કે જા પવન ખેરા આસામના અધિકારક્ષેત્ર ધરાવતી કોર્ટમાં આગોતરા જામીન માટે અરજી કરે છે, તો તેમના કેસ પર નિષ્પક્ષ રીતે વિચારણા કરવામાં આવશે અને અગાઉના આદેશથી તેની કોઈ અસર થશે નહીં. ખેરાએ ત્યારબાદ સુપ્રીમ કોર્ટને સ્ટે હટાવવા અને તેમના ટ્રાન્જીટ જામીન લંબાવવા વિનંતી કરી હતી, પરંતુ કોર્ટે આ વિનંતીને ફગાવી દીધી હતી.
આ કાનૂની સ્થિતિને ધ્યાનમાં રાખીને, પવન ખેરાએ હવે સીધા ગુવાહાટી હાઈકોર્ટમાં આગોતરા જામીન અરજી દાખલ કરી છે. દરમિયાન, આસામ પોલીસ આ કેસમાં ખૂબ જ સક્રિય રહી છે, જેમણે અગાઉ હૈદરાબાદમાં ખેરાની શોધ કરી હતી. વધુમાં, પોલીસે દિલ્હીમાં તેમના ઘરે પણ મુલાકાત લીધી હતી અને તપાસ હાથ ધરી હતી. આ કેસમાં આગળનો નિર્ણય ગૌહાટી હાઈકોર્ટમાં સુનાવણી પછી જ લેવામાં આવશે, જે નક્કી કરશે કે પવન ખેરાને રાહત મળે છે કે નહીં.
