કેન્દ્રીય ગૃહ મંત્રાલય (એમએચએ) ના ભૂતપૂર્વ અંડર સેક્રેટરી આરવીએસ મણિના નિવેદનથી ભારત-પાકિસ્તાન ક્રિકેટને લગતા જૂના વિવાદો ફરી શરૂ થયા છે. એએનઆઈ સાથેના પોડકાસ્ટમાં તેમણે દાવો કર્યો હતો કે પાકિસ્તાન ક્રિકેટ ટીમ અને તેના પ્રતિનિધિમંડળના કેટલાક સભ્યો ભારતની મુલાકાતો દરમિયાન ડ્રગ્સની હેરાફેરીમાં કથિત રીતે સામેલ હતા. તેમણે પાકિસ્તાનની ગુપ્તચર એજન્સી, આઈએસઆઈ પર પણ આ પ્રવૃત્તિ પાછળ હોવાનો આરોપ લગાવ્યો હતો.
આરવીએસ મણિએ એએનઆઈ સાથેના પોડકાસ્ટમાં દાવો કર્યો હતો, “જુઓ, એવા અહેવાલો હતા કે શોએબ અખ્તર અને મોહમ્મદ આસિફ, ક્રિકેટરોએ પાકિસ્તાની હાઇ કમિશનર સમક્ષ સ્વીકાર્યું હતું કે તેઓ ડ્રગ્સ લાવ્યા હતા. ત્યારબાદ તેમને દેશનિકાલ કરવામાં આવ્યા હતા.”
સ્મિતા પ્રકાશે સમજાવ્યું કે શોએબ અને આસિફે ત્યારે કહ્યું હતું કે ડ્રગ્સ તેમના અંગત ઉપયોગ માટે હતા. મણિએ જવાબ આપ્યો, “જ્યારે પણ પાકિસ્તાની પ્રતિનિધિમંડળ, ક્રિકેટ ટીમ અથવા અન્ય ટીમ ભારતની મુલાકાત લે છે, ત્યારે ડ્રગ્સની દાણચોરી કરવામાં આવતી હતી. તે અંગત ઉપયોગ માટે નહોતી.”
અહેવાલ મુજબ, શોએબ અખ્તર અને મોહમ્મદ આસિફને ઓક્ટોબર ૨૦૦૬માં ભારતથી પાકિસ્તાન મોકલી દેવામાં આવ્યા હતા.આઇસીસી ચેમ્પીયન્સ ટ્રોફી પહેલા લેવામાં આવેલા ડોપિંગ ટેસ્ટમાં બંને ખેલાડીઓના પ્રતિબંધિત એનાબોલિક સ્ટીરોઈડ નેન્ડ્રોલોન માટે સકારાત્મક પરીક્ષણ બાદ પાકિસ્તાન ક્રિકેટ બોર્ડે તેમને પાછા બોલાવ્યા હતા. શરૂઆતમાં બંને ખેલાડીઓ પર પ્રતિબંધ મૂકવામાં આવ્યો હતો, પરંતુ ડિસેમ્બર ૨૦૦૬માં એક ટ્રિબ્યુનલે તેમને આરોપોમાંથી મુક્ત કર્યા હતા.
તેમણે કહ્યું, “શોએબ-આસિફ ઘટનાના લગભગ છ મહિના પછી, પાકિસ્તાની ટીમના અંગ્રેજી કોચ, બોબ વૂલમર, જે પાકિસ્તાનીઓ દ્વારા ડ્રગ્સની હેરાફેરીનો વિરોધ કરી રહ્યા હતા, તેમનું શંકાસ્પદ સંજાગોમાં મૃત્યુ થયું.”જોકે, એ નોંધનીય છે કે બોબ વૂલમરના મૃત્યુની તપાસ ઘણી એજન્સીઓ દ્વારા કરવામાં આવી હતી, અને આવા આરોપોની સત્તાવાર પુષ્ટિ કરવામાં આવી નથી.વૂલમરના મૃત્યુનું રહસ્ય હજુ સુધી ઉકેલાયું નથી. મણિએ કહ્યું, “આ બધા બિંદુઓ જોડાયેલા હોવા જોઈએ, અને તે ચોક્કસ છે કે પાકિસ્તાની ટીમો ડ્રગ્સ લાવી રહી હતી.”
ભૂતપૂર્વ અધિકારીએ કહ્યું કે તેમના કાર્યકાળ દરમિયાન, ગૃહ મંત્રાલયમાં ચર્ચાઓ થઈ હતી કે આતંકવાદ ભંડોળનો નોંધપાત્ર ભાગ ડ્રગ્સની હેરાફેરીમાંથી આવતો હતો.તેમણે કહ્યું, “તે સમયેના અહેવાલો અનુસાર, ભારતમાં લગભગ ૩૦ ટકા આતંકવાદી હુમલાઓ ડ્રગ્સની હેરાફેરી દ્વારા ભંડોળ પૂરું પાડવામાં આવતું હતું. પાકિસ્તાનથી ભારતમાં ડ્રગ્સ મોકલવું એ પાકિસ્તાનની સરકારી નીતિનો ભાગ હતો.”મણિએ કહ્યું, “અમારું મૂલ્યાંકન એવું હતું કે જો જલાલાબાદમાં પાક સારો રહે તો ભારતમાં આતંકવાદી હુમલાઓની સંખ્યા વધી શકે છે. અમે આના આધારે અમારી આગાહીઓ કરી હતી.”
જ્યારે પૂછવામાં આવ્યું કે પાકિસ્તાને ડ્રગ્સની હેરાફેરી માટે સેલિબ્રિટીનો ઉપયોગ કેમ કર્યો, ત્યારે મણિએ કહ્યું, “આસિફ અને અખ્તર પણ પ્રખ્યાત લોકોમાં હતા. તેવી જ રીતે, સલીમ મલિક અને શાહિદ આફ્રિદી પણ પ્રખ્યાત ક્રિકેટરોમાં હતા. આ કેસમાં તેમના નામ કદાચ સામે ન આવ્યા હોય, પરંતુ કદાચ આખી ટીમ સંડોવાયેલી હતી અને તેઓ આ કામ કરતા હતા.”
