ઓડિશાના કાલાહાંડી જિલ્લામાં એક દુઃખદ અકસ્માત થયો છે. બાંધકામાધીન સેપ્ટિક ટાંકીમાં કામ કરતી વખતે શ્વાસ રૂંધાઈ જવાથી છ લોકોના મોત થયા છે. અકસ્માતમાં અન્ય એક કામદાર ગંભીર રીતે ઘાયલ થયો છે અને હોÂસ્પટલમાં સારવાર હેઠળ છે. મંગળવારે કાલાહાંડી જિલ્લાના મદનપુર-રામપુર વિસ્તારના ગૌર કારલાખુંટા ગામમાં આ ઘટના બની હતી. અકસ્માત બાદ આખું ગામ શોકમાં છે.
પ્રાથમિક માહિતી મુજબ, ગામમાં એક ઘર પાસે એક નવી સેપ્ટિક ટાંકી બનાવવામાં આવી રહી હતી. કેટલાક કામદારો ટાંકીની અંદર સેન્ટરિંગ દૂર કરવા માટે કામ કરી રહ્યા હતા. અચાનક, ટાંકીની અંદર ગૂંગળામણની સ્થિતિ સર્જાઈ ગઈ, અને અંદર કામદારો બેભાન થવા લાગ્યા. એવું કહેવાય છે કે પહેલા જે લોકો અંદર પ્રવેશ્યા તેમાંથી કેટલાક બેભાન થઈ ગયા. અન્ય લોકોએ એક પછી એક તેમને બચાવવાનો પ્રયાસ કર્યો, પરંતુ ઝેરી ગેસ અને ઓક્સિજનના અભાવે તેઓ પણ બેભાન થઈ ગયા. આ બચાવ પ્રયાસ ઝડપથી મોટી દુર્ઘટનામાં ફેરવાઈ ગયો. મૃતકોમાં ત્રણ કડિયા, એક મજૂર, ઘરમાલિક અને તેનો પુત્ર શામેલ હોવાનું જાણવા મળે છે.
ઘટનાની માહિતી મળતા જ સ્થાનિક રહેવાસીઓ અને વહીવટીતંત્ર ઘટનાસ્થળે દોડી ગયા. ઘણા પ્રયાસો પછી, બધાને ટાંકીમાંથી બહાર કાઢવામાં આવ્યા. તેમને તાત્કાલિક મદનપુર રામપુર સામુદાયિક આરોગ્ય કેન્દ્રમાં લઈ જવામાં આવ્યા, જ્યાં ડોકટરોએ છ લોકોને મૃત જાહેર કર્યા. અન્ય એક ઘાયલ કામદારની હાલત ગંભીર હોવાનું કહેવાય છે અને તેની સારવાર ચાલી રહી છે. આ દુઃખદ ઘટનાથી સમગ્ર વિસ્તારમાં શોક છવાઈ ગયો છે. ગ્રામજનો આઘાતમાં છે. એવી શંકા છે કે ટાંકીની અંદર ઝેરી ગેસ હતો, જેના કારણે આ અકસ્માત થયો હતો.
ઘટનાની માહિતી મળ્યા બાદ, મદનપુર રામપુર પોલીસ ઘટનાસ્થળે પહોંચી અને મામલાની તપાસ શરૂ કરી. પોલીસ સલામતી વ્યવસ્થામાં કોઈ બેદરકારી રહી છે કે કેમ તે નક્કી કરવાનો પ્રયાસ કરી રહી છે. ઓડિશાના મુખ્યમંત્રી મોહન ચરણ માઝીએ આ દુઃખદ અકસ્માતમાં છ લોકોના મોત પર ઊંડો શોક વ્યક્ત કર્યો. મુખ્યમંત્રીએ મૃતકોના પરિવારજનો પ્રત્યે સંવેદના વ્યક્ત કરી અને દરેક મૃતકના સગાસંબંધીઓને મુખ્યમંત્રી રાહત ભંડોળમાંથી ૪ લાખની સહાયની જાહેરાત કરી.
સીએમઓના જણાવ્યા અનુસાર છ મૃતકોના નામ આ પ્રમાણે છે.
નિમય ચરણ પાલ (પિતાઃ ગંગાધર પાલ)
આકાશ પાલ (પિતાઃ નિમયીન ચરણ પાલ)
અદલ માઝી (પિતાઃ વિષ્ણુ માઝી)
બૈકુષ્ઠ જલ (પિતાઃ મધુ જલ)
મનરંજન હાટી (પિતાઃ ધનસાગર હાટી)
ચાંદ જલ (પિતાઃ બલદેવ જલ)
