ઉત્તરાખંડના ટિહરી જિલ્લાના ધનૌલ્ટી વિસ્તારમાં ભારે વરસાદ પડ્યો. ત્યારબાદ, બિલૌંડી પુલ બજારમાં પાણી અને કાટમાળ અનેક દુકાનો અને ઘરોમાં ઘૂસી ગયા. નાગુન-ભવન-દેહરાદૂન હાઇવે બ્લોક થવાને કારણે રાજ્યના એક મંત્રી અને એક ધારાસભ્ય પણ એક કલાકથી વધુ સમય માટે ફસાયેલા રહ્યા હતા.
ધનૌલ્ટી તાલુકાના નૌઘર ગામમાં બપોરે અચાનક પડેલા ભારે વરસાદને કારણે અલાગડ નદીનું પાણીનું સ્તર વધી ગયું. બિલૌંડી પુલ બજારમાં દુકાનો અને ઘરોમાં વરસાદી પાણી ભરાઈ ગયા. રસ્તા પર મોટા પ્રમાણમાં કાટમાળ જમા થવાથી નાગુન-ભવન-દેહરાદૂન રાજ્ય ધોરીમાર્ગ પણ બંધ થઈ ગયો, જેના કારણે રાજ્યના કેબિનેટ મંત્રી ભરત સિંહ ચૌધરી અને ધનૌલ્ટીના ધારાસભ્ય પ્રીતમ સિંહ પનવારના વાહનો, જે આ માર્ગ પરથી પસાર થઈ રહ્યા હતા, લગભગ એક કલાક સુધી ફસાયેલા રહ્યા.
બિલોડી પુલ બજારમાં દુકાનોમાં પાણી ઘૂસી ગયાના અહેવાલ મળ્યા બાદ ઘટનાસ્થળે પહોંચેલા મહેસૂલ સબ-ઇન્સ્પેક્ટર અંબુજ ચૌધરીએ જણાવ્યું હતું કે બપોરે ૩ થી ૪ વાગ્યાની વચ્ચે આ વિસ્તારમાં ભારે વરસાદ પડ્યો હતો અને વરસાદી પાણી કાટમાળ સાથે દુકાનોમાં ઘૂસી ગયું હતું. ચૌધરીએ જણાવ્યું હતું કે નાગુન-ભવન-દહેરાદૂન રોડ પર પાણી અને કાટમાળને કારણે ટ્રાફિક જામ થયો હતો, જેને ત્નઝ્રમ્ મશીન દ્વારા સાફ કરવામાં આવ્યો હતો.
ઉપ-જિલ્લા મેજિસ્ટ્રેટ નીલુ ચાવલાએ અહેવાલ આપ્યો હતો કે બિલોડી નજીક વરસાદી પાણી અને કાટમાળ લગભગ ૧૦ દુકાનોમાં ઘૂસી ગયો હતો. બિલોડી પુલ રોડ પર કાટમાળને કારણે, ત્યાંથી પસાર થઈ રહેલા ચૌધરી અને પનવાર એક કલાકથી વધુ સમય માટે ફસાયેલા રહ્યા હતા. કેબિનેટ મંત્રી ભરત સિંહ ચૌધરી ઉત્તરકાશીની મુલાકાત લીધા પછી દેહરાદૂન જઈ રહ્યા હતા.
