લાઠી તાલુકાના દુધાળા-બાઇ ગામના પીવાના પાણીની સુવિધાને વધુ સુવ્યવસ્થિત બનાવવા રાજ્ય સરકારે રૂ. ૧૮.૮૭ લાખના ખર્ચે ૬૦ હજાર લીટરની ક્ષમતાવાળી ઊંચી પાણીની ટાંકી (ઓવરહેડ વોટર ટાંકી) માટે મંજૂરી આપી છે. આ મહત્વપૂર્ણ વિકાસકાર્ય માટે ધારાસભ્ય જનકભાઈ તળાવીયાએ રાજ્ય સરકારમાં સતત અસરકારક રજૂઆતો કરી હતી. ગામમાં વધતી વસતિ અને પીવાના પાણીની જરૂરિયાતને ધ્યાનમાં રાખીને લાંબા સમયથી નવી ઊંચી પાણીની ટાંકીની માંગણી થઇ રહી હતી. ધારાસભ્ય જનકભાઈએ આ માંગણીને પ્રાથમિકતા આપતાં સંબંધિત વિભાગ સમક્ષ સતત રજૂઆતો કરી હતી. આ ટાંકીના નિર્માણ બાદ ગામમાં પીવાના પાણીના સંગ્રહ અને વિતરણ વ્યવસ્થામાં નોંધપાત્ર સુધારો થશે. ઉનાળાની ઋતુમાં પાણીની અછત જેવી સમસ્યાઓમાં પણ રાહત મળશે અને ગામના દરેક વિસ્તારમાં વધુ સુવ્યવસ્થિત રીતે પાણી પહોંચાડવામાં મદદ મળશે. ગામના સરપંચ, પંચાયતના સભ્યો તથા ગ્રામજનોએ આ મહત્વપૂર્ણ વિકાસકાર્ય માટે રાજ્ય સરકાર અને ધારાસભ્ય જનકભાઈ તળાવીયાનો આભાર વ્યક્ત કર્યો હતો.
