ઘુઘરાળા ગામમાં ગ્રામ પંચાયતની ગંભીર બેદરકારીનો મુદ્દો સામે આવ્યો છે, જ્યાં મેઈન રોડ પર ગટરનું ઢાંકણું છેલ્લા બે મહિનાથી તૂટેલી હાલતમાં છે. પરિણામે રસ્તા પર મોટો અને જીવલેણ ખાડો ઉભો થયો છે, જે ગામલોકો માટે સતત જોખમ બની રહ્યો છે. છતાં આ સમસ્યા અંગે ગ્રામ પંચાયત દ્વારા હજુ સુધી કોઈ યોગ્ય કાર્યવાહી હાથ ધરવામાં આવી નથી. સ્થાનિક રહેવાસીઓના જણાવ્યા મુજબ, આ ખાડાના કારણે અનેક લોકો અકસ્માતનો ભોગ બની ચૂક્યા છે. ખાસ કરીને રાત્રિના સમયે પ્રકાશની અછતને કારણે ખાડો દેખાતો નથી, જેના કારણે બાઈકચાલકો અને પદયાત્રીઓ વારંવાર ઇજાગ્રસ્ત થાય છે. નાના બાળકો અને વૃદ્ધો માટે આ સ્થિતિ વધુ ખતરનાક સાબિત થઈ રહી છે. ગામલોકોમાં આ મુદ્દે ભારે રોષ ફાટી નીકળ્યો છે. તેઓનું કહેવું છે કે ચૂંટણી સમયે વિકાસના મોટા મોટા વચનો આપી મત મેળવવામાં આવે છે, પરંતુ ચૂંટાયા બાદ મૂળભૂત સુવિધાઓ તરફ પૂરતું ધ્યાન આપવામાં આવતું નથી. સ્થાનિકોએ તાત્કાલિક આ ખાડો પુરાવી રસ્તાનું સમારકામ કરવાની તેમજ જવાબદાર અધિકારીઓ સામે કડક કાર્યવાહી કરવાની માંગ ઉઠાવી છે.
