બોલીવુડ અભિનેતા અજય દેવગણ, મહારાષ્ટ્રના મુખ્યમંત્રી દેવેન્દ્ર ફડણવીસના પત્ની અને દિવ્યજ ફાઉન્ડેશનના સ્થાપક અમૃતા ફડણવીસ સાથે, મુંબઈના જુહુ બીચ પર સ્વચ્છતા અભિયાનમાં જોડાયા. અભિનેતાએ દિવ્ય ફાઉન્ડેશનના “સી શોર શાઇન ૨૦૨૬” અભિયાનમાં ભાગ લીધો. આને ગણપતિ વિસર્જન પછી મુંબઈના સૌથી મોટા બીચ સફાઈ કાર્યક્રમ તરીકે વર્ણવવામાં આવી રહ્યું છે, જેનો ઉદ્દેશ્ય નાગરિકોને સ્વચ્છ બીચ અને જવાબદાર ભવિષ્યને પ્રોત્સાહન આપવા માટે એકસાથે લાવવાનો છે.
આ કાર્યક્રમના એક વીડિયોમાં, અભિનેતા અજય દેવગણ ગણપતિ વિસર્જન પછી બચેલા કચરો અને વસ્તુઓ એકઠી કરીને અન્ય સ્વયંસેવકો સાથે બેગમાં મૂકતા જોવા મળે છે. કાર્યક્રમમાં બોલતા, અજયે કહ્યું, “જેમ આપણે બધા આપણા ઘરોને પ્રેમ કરીએ છીએ અને તેમને સ્વચ્છ રાખીએ છીએ, તેમ મને લાગે છે કે આપણે આપણા દેશ, આપણા શહેર અને આપણા સમુદ્રોને પણ પ્રેમ કરીએ છીએ, શું તમને નથી લાગતું કે તે આપણી જવાબદારી છે?”
અજય દેવગણે નાગરિકોને તેમના આસપાસના વિસ્તારને સ્વચ્છ રાખવા માટે વ્યક્તિગત જવાબદારી લેવા વિનંતી કરી, કહ્યું, “જ્યાં સુધી આપણે આપણા શહેર અને દેશને સ્વચ્છ રાખવાનું નક્કી ન કરીએ, ત્યાં સુધી કંઈ બદલાશે નહીં.” અજયે લોકોને નાના પ્રયાસો કરવા માટે પણ પ્રોત્સાહિત કર્યા, કહ્યું, “જો દરેક વ્યક્તિ થોડો પણ પ્રયાસ કરે, તો આપણે સરળતાથી બધું સ્વચ્છ રાખી શકીએ છીએ.” તેમણે પોતાના સંદેશનો અંત એમ કહીને કર્યો, “આપણું ભવિષ્ય તમારા બધા પર નિર્ભર છે.”
આ પહેલ એક મહત્વપૂર્ણ સમયે આવી છે, કારણ કે ગણેશ વિસર્જન પછી મુંબઈના દરિયાકિનારા કચરો અને પ્રદૂષણનો સામનો કરી રહ્યા છે. ૨૦૨૫ માં, અભિનેતા અક્ષય કુમારે પણ તહેવારો પછી મુંબઈના જુહુ બીચ પર સફાઈ અભિયાનમાં ભાગ લીધો હતો. બોલીવુડનો “સિંઘમ“ અજય હાલમાં “દ્રશ્યમઃ ધ કન્ક્‌લુઝન” માટે તૈયારી કરી રહ્યો છે, જેમાં જયદીપ અહલાવત, તબ્બુ, શ્રિયા સરન, રજત કપૂર, પ્રકાશ રાજ, ઇશિતા દત્તા અને મૃણાલ જાધવ અભિનીત છે. આગળ, અજય દેવગણ “ચૌહાણ” અને “ગોલમાલ ૫” લઈને આવી રહ્યા છે.