આણંદ જિલ્લાના ખંભાત તાલુકામાં સગીર દીકરી સાથે દુષ્કર્મના ગંભીર આક્ષેપોનો કિસ્સો સામે આવ્યો છે. ખંભાત ગ્રામ્ય પોલીસે ૪૮ વર્ષીય પિતાની ધરપકડ કરી છે. પોલીસ ફરિયાદ મુજબ, આરોપી પિતાએ પોતાની ૧૭ વર્ષની દીકરી સાથે આશરે પાંચ વર્ષ સુધી દુષ્કર્મ આચર્યું હોવાનો આક્ષેપ છે.મળતી માહિતી મુજબ, સગીરા નાની વયની હતી ત્યારથી જ આરોપી પિતા તેની સાથે અયોગ્ય વર્તન કરતો હોવાનો ફરિયાદમાં ઉલ્લેખ કરવામાં આવ્યો છે. સગીરાએ આ અંગે કોઈને જાણ કરવાનો પ્રયાસ કરે તો આરોપી પિતા તેની માતાને જાનથી મારી નાખવાની ધમકી આપતો હોવાનો પણ આક્ષેપ કરવામાં આવ્યો છે.આ ધમકીના કારણે સગીરા લાંબા સમય સુધી સમગ્ર ઘટના અંગે મૌન રહી હોવાનું સામે આવ્યું છે. વર્ષો સુધી ભયના વાતાવરણમાં રહ્યા બાદ આખરે સગીરાએ હિંમત કરીને પરિવારને પોતાની સાથે બનેલી ઘટનાની જાણ કરી હતી. ત્યારબાદ સમગ્ર મામલો પોલીસ સુધી પહોંચ્યો હતો.
ફરિયાદ મળ્યા બાદ ખંભાત ગ્રામ્ય પોલીસ એક્શનમાં આવી હતી. પોલીસે સગીરાની ફરિયાદના આધારે આરોપી પિતા સામે દુષ્કર્મ અને સગીરાના રક્ષણ માટે લાગુ પડતી પોસ્કો એકટની જાગવાઈઓ હેઠળ ગુનો નોંધ્યો હોવાનું જણાવાયું છે. પોલીસે ૪૮ વર્ષીય આરોપીની ધરપકડ કરી આગળની કાયદેસરની કાર્યવાહી હાથ ધરી છે. તપાસ દરમિયાન સગીરાનું તબીબી પરીક્ષણ કરાવવામાં આવ્યું હોવાનું તેમજ ઘટનાને લગતા જરૂરી પુરાવા એકત્ર કરવાની કાર્યવાહી ચાલી રહી હોવાનું જાણવા મળ્યું છે.પોલીસ હવે ફરિયાદમાં કરવામાં આવેલા આક્ષેપોની વધુ તપાસ કરી રહી છે. ઘટનાની ચોક્કસ વિગતો અને અન્ય કાયદાકીય પાસાં તપાસ પૂર્ણ થયા બાદ વધુ સ્પષ્ટ થશે.
