પ્રધાનમંત્રી શ્રી નરેન્દ્ર મોદીએ આજે ૭, લોક કલ્યાણ માર્ગ ખાતે વર્લ્ડસ્કીલ્સ સ્પર્ધા, શાંઘાઈ ૨૦૨૬ની ભારતની ટીમના પ્રતિનિધિઓ સાથે સંવાદ કર્યો હતો.સંવાદ દરમિયાન, સહભાગીઓએ સ્પર્ધા દરમિયાનના તેમના અનુભવો શેર કર્યા હતા. તેઓએ વૈશ્વીક મંચ પર પોતાના દેશનું પ્રતિનિધિત્વ કરવા બદલ ગૌરવ વ્યક્ત કર્યું હતું. સહભાગીઓએ આંતરરાષ્ટ્રીય સ્પર્ધા દરમિયાન નવા ટૂલ્સ, સોફ્ટવેર, તકનીકી પ્રણાલીઓ અને કાર્ય પ્રક્રિયાઓ સાથે અનુકૂલન સાધવા અંગે ચર્ચા કરી હતી. તેઓએ કૌશલ્ય વિકાસ તરફ સરકાર દ્વારા કરવામાં આવી રહેલા કાર્ય વિશે પણ વાત કરી જે યુવાનોને મદદ કરી રહ્યું છે.
પ્રધાનમંત્રીએ વૈશ્વીક મંચ પર ભારતનું પ્રતિનિધિત્વ કરવા બદલ સહભાગીઓને અભિનંદન પાઠવ્યા હતા. તેમણે તેમને કૌશલ્ય વિકાસના એમ્બેસેડર બનવા માટે અનુરોધ કર્યો હતો. તેમણે કહ્યું કે વ્યવહારુ કૌશલ્ય એકેડેમિક ડિગ્રી જેટલા જ મહત્વપૂર્ણ છે.
વિશિષ્ટ કૌશલ્યોના મહત્વ પર પ્રકાશ પાડતા પ્રધાનમંત્રીએ કહ્યું કે જેમ જેમ ટેકનોલોજી ઝડપથી વિકસે છે, તેમ યુવાનોએ સતત નવા કૌશલ્યો પ્રાપ્ત કરવા જોઈએ, તેમની હાલની ક્ષમતાઓને અપગ્રેડ કરવી જોઈએ અને ઉભરતી ટેકનોલોજી સાથે અનુકૂલન સાધવું જોઈએ. તેમણે સહભાગીઓને
આંતરરાષ્ટ્રીય બજારની જરૂરિયાતો અનુસાર કૌશલ્ય વિકસાવવા અને તેમના અનુભવો અને સૂચનો દ્વારા ભારતની કૌશલ્ય તાલીમ ઇકોસિસ્ટમમાં સુધારો કરવામાં યોગદાન આપવા વિનંતી કરી હતી. તેમણે ભારતને કુશળ માનવ સંસાધનોના વૈશ્વીક હબ તરીકે સ્થાપિત કરવા માટે યુવાનો, સરકાર અને તાલીમ સંસ્થાઓ દ્વારા સંકલિત પ્રયાસોની જરૂરિયાત પર ભાર મૂક્યો હતો.
પ્રધાનમંત્રીએ કૌશલ્ય વિકાસ માટે એક અલગ મંત્રાલય સ્થાપવા પાછળના ઉદ્દેશ્યને રેખાંકિત કર્યો હતો અને કહ્યું હતું કે કૌશલ્ય તાલીમ સંસ્થાઓનું મહત્વ આઇઆઇટી અને આઇઆઇએમ કરતા ઓછું નથી. તેમણે ભારતની કૌશલ્ય તાલીમ પ્રણાલીમાં સુધારો કરવામાં મદદ કરવા માટે સહભાગીઓને સરકાર સાથે તેમના અનુભવો અને સૂચનો શેર કરવા પ્રોત્સાહિત કર્યા હતા.
વર્લ્ડસ્કીલ્સ એ વિશ્વની અગ્રણી આંતરરાષ્ટ્રીય કૌશલ્ય સ્પર્ધા છે, જે સહભાગી દેશો અને પ્રદેશોના યુવા વ્યાવસાયિકોને વ્યવસાયિક અને તકનીકી કૌશલ્યોની વ્યાપક શ્રેણીમાં શ્રેષ્ઠતા દર્શાવવા માટે એકસાથે લાવે છે. વર્લ્ડસ્કીલ્સ શાંઘાઈ ૨૦૨૬, ૪૮મી વર્લ્ડસ્કીલ્સ સ્પર્ધા, ૨૨ થી ૨૭ સપ્ટેમ્બર ૨૦૨૬ દરમિયાન શાંઘાઈના નેશનલ એક્ઝીબિશન એન્ડ કન્વેન્શન સેન્ટર ખાતે યોજાઈ હતી. ટીમ ઇન્ડિયાએ ૪૮મી વર્લ્ડસ્કીલ્સ સ્પર્ધા, શાંઘાઈ ૨૦૨૬માં ૬ સિલ્વર મેડલ અને ૨૦ મેડલ ફોર એક્સેલન્સ જીતીને ૧૦મું સ્થાન મેળવ્યું હતું. ૬૩ કૌશલ્યોમાં ભાગ લેતા ૭૦ સ્પર્ધકોની અત્યાર સુધીની સૌથી મોટી ટુકડી દ્વારા ભારતનું પ્રતિનિધિત્વ કરવામાં આવ્યું હતું.
આ સંવાદમાં કેન્દ્રીય કૌશલ્ય વિકાસ અને ઉદ્યોગસાહસિકતા રાજ્ય મંત્રી (સ્વતંત્ર પ્રભારી) અને શિક્ષણ રાજ્ય મંત્રી શ્રી જયંત ચૌધરી અને ભારત સરકારના વરિષ્ઠ અધિકારીઓએ પણ હાજરી આપી હતી.
