પેપર લીક થયા બાદ દ્ગઈઈ્ ૨૦૨૬ ની પરીક્ષા રદ કરવામાં આવી છે. ફરીથી પરીક્ષાની નવી તારીખ પણ જાહેર કરવામાં આવી છે. દરમિયાન, નીટ પરીક્ષા અંગે સુપ્રીમ કોર્ટમાં એક નવી અરજી દાખલ કરવામાં આવી છે. આ અરજી આરજેડી સાંસદ સુધાકર સિંહ, સામાજિક કાર્યકર્તા અનુભવ ગર્ગ, ઇન્ડિયન મેડિકલ એસોસિએશનના રાષ્ટ્રીય પ્રવક્તા ડા. ધ્રુવ ચૌહાણ અને રાજકીય નેતા હરિશરણ દેવગણ દ્વારા સુપ્રીમ કોર્ટના વકીલ સત્યમ સિંહ રાજપૂત દ્વારા દાખલ કરવામાં આવી હતી. આ અરજીમાં નીટ યુજી ૨૦૨૬ પરીક્ષા પ્રણાલીમાં ફેરફારની માંગ કરવામાં આવી છે.
અરજદારો નીટ યુજીની વર્તમાન પેન-એન્ડ-પેપર પરીક્ષા પ્રણાલી પર પ્રશ્ન ઉઠાવે છે અને તેને તાત્કાલિક કમ્પ્યુટર આધારિત ટેસ્ટ મોડમાં રૂપાંતરિત કરવાની માંગ કરે છે. અરજીમાં સુપ્રીમ કોર્ટને વિનંતી કરવામાં આવી છે કે “૨૧ જૂન, ૨૦૨૬ ના રોજ પ્રસ્તાવિત ફરીથી આયોજિત પરીક્ષાને પરંપરાગત ઑફલાઇન મોડને બદલે સીબીટી મોડમાં યોજવાનો નિર્દેશ આપે.” અરજીમાં કેન્દ્ર સરકાર અને સંબંધિત એજન્સીઓને નીટ યુજીને સંપૂર્ણપણે ડિજિટલ પરીક્ષા પ્રણાલીમાં રૂપાંતરિત કરવા માટે સમય-બાઉન્ડ રોડમેપ સબમિટ કરવા પણ વિનંતી કરવામાં આવી છે, જેમાં પરીક્ષા કેન્દ્રોની તૈયારી, સાયબર સુરક્ષા પગલાં અને ઉમેદવારો માટે સુલભતા સુનિશ્ચિત કરવા જેવા પાસાઓનો સમાવેશ થાય છે.”
અરજીકર્તાઓ રાષ્ટ્રીય પરીક્ષા એજન્સીને નાબૂદ કરવા અને એક નવી, સ્વતંત્ર અને પારદર્શક રાષ્ટ્રીય પરીક્ષા સત્તામંડળની સ્થાપના કરવાની પણ માંગ કરે છે, જે કાનૂની જવાબદારી અને ન્યાયિક દેખરેખ હેઠળ કાર્ય કરશે. વધુમાં, તેઓ રાષ્ટ્રીય પરીક્ષાઓની સુરક્ષામાં માળખાકીય સુધારા સૂચવવા માટે નિવૃત્ત સુપ્રીમ કોર્ટના ન્યાયાધીશો, શિક્ષણવિદો, મનોવૈજ્ઞાનિકો, સાયબર સુરક્ષા નિષ્ણાતો અને ફોરેન્સિક નિષ્ણાતોની બનેલી ઉચ્ચ-સ્તરીય દેખરેખ સમિતિની રચના કરવાની માંગ કરે છે.
અરજીમાં રાધાકૃષ્ણન સમિતિની ભલામણોનો કડક અમલ, તમામ રાષ્ટ્રીય પરીક્ષાઓ માટે એન્ક્રિપ્ટેડ ડિજિટલ પેપર ટ્રાન્સમિશન, બાયોમેટ્રિક ચકાસણી, એઆઇ-આધારિત દેખરેખ પ્રણાલીઓ અને કડક સાયબર સુરક્ષા પ્રોટોકોલ ફરજિયાત બનાવવાની પણ માંગ કરવામાં આવી છે. પ્રશ્નપત્રોનું “ડિજિટલ લોકિંગ” અને સીબીટી મોડેલ અપનાવવાને પેપર લીક અટકાવવા માટે જરૂરી પગલાં તરીકે ટાંકવામાં આવ્યા છે.
