અમરેલી શહેરમાં અસામાજિક તત્વો સામે લાલ આંખ કરતા પોલીસે એક મોટી સફળતા મેળવી છે. તાજેતરમાં એક લગ્નપ્રસંગના ભોજન સમારોહમાં હિંસક મારામારી કરી નાસતા ફરતા કુખ્યાત હિસ્ટ્રીશીટર યુવરાજ મકવાણાને પોલીસે ઝડપી પાડ્યો છે. માત્ર ધરપકડ જ નહીં, પરંતુ પોલીસે તેને એ જ સ્થળે લઈ જઈને કાયદાનું ભાન કરાવ્યું હતું જ્યાં તેણે આતંક મચાવ્યો હતો.
અમરેલી ડીવાયએસપીની સીધી દેખરેખ હેઠળ પોલીસની ટીમે આ કેસમાં કડક વલણ અપનાવ્યું હતું. ધરપકડ બાદ આરોપી યુવરાજ મકવાણાને ગુનાના સ્થળે લઈ જઈને ઘટનાનું રીકન્સ્ટ્રક્શન કરવામાં આવ્યું હતું. જે લગ્નપ્રસંગમાં નિર્દોષ લોકો વચ્ચે તેણે હિંસા આચરી હતી, ત્યાં જ પોલીસે તેનો જાહેરમાં ‘વરઘોડો’ કાઢ્યો હતો. પોલીસની આ કાર્યવાહીનો મુખ્ય હેતુ લોકોના મનમાંથી ગુનેગારનો ડર દૂર કરવાનો અને અસામાજિક તત્વોમાં કાયદાનો ભય પેદા કરવાનો હતો.
પોલીસ તપાસમાં બહાર આવ્યું છે કે યુવરાજ મકવાણા એક રીઢો ગુનેગાર છે. તેની વિરુદ્ધ અગાઉ હત્યાના પ્રયાસ સહિત કુલ ૧૨ જેટલા ગંભીર ગુનાઓ નોંધાયેલા છે. આ પૂર્વે તેને અદાલત દ્વારા ૧૦ વર્ષની સજા અને દંડ પણ ફટકારવામાં આવ્યો હતો. જોકે, જામીન પર છૂટ્યા બાદ તેણે ફરીથી ગુનાહિત પ્રવૃત્તિ શરૂ કરી હતી.
લગ્ન જેવા પવિત્ર પ્રસંગમાં હિંસા આચરી શહેરની શાંતિ ડહોળનારા આ શખ્સની ધરપકડથી અમરેલી પોલીસે સ્પષ્ટ સંદેશ આપ્યો છે કે કોઈપણ ગુનેગારને બક્ષવામાં આવશે નહીં. પોલીસની આ કાર્યવાહીથી સ્થાનિક રહીશોમાં સુરક્ષાની ભાવના પ્રબળ બની છે અને અસામાજિક તત્વોમાં ફફડાટ ફેલાઈ ગયો છે.
