યુએસ ટ્રેઝરી સેક્રેટરી સ્કોટ બેસન્ટે જાહેરાત કરી છે કે ભારતીય રિફાઇનરીઓને અવિરત વૈશ્વિક તેલ પુરવઠો જાળવવા માટે રશિયન તેલ ખરીદવા માટે ૩૦ દિવસની કામચલાઉ મુક્તિ આપવામાં આવી રહી છે. સોશિયલ મીડિયા પ્લેટફોર્મ એકસ પર પોસ્ટ કરતા, બેસન્ટે લખ્યું, “વૈશ્વિક બજારમાં તેલનો પુરવઠો ચાલુ રાખવા માટે, ટ્રેઝરી વિભાગ ભારતીય રિફાઇનરીઓને રશિયન મૂળના ક્રૂડ તેલ અને પેટ્રોલિયમ ઉત્પાદનો ખરીદવાની મંજૂરી આપવા માટે ૩૦ દિવસની કામચલાઉ છૂટ આપી રહ્યું છે. આ છૂટ ખાસ કરીને ૫ માર્ચ, ૨૦૨૬ સુધી દરિયામાં ફસાયેલા જહાજા પર ભરેલા તેલ પર લાગુ થશે.”
બેસન્ટે સ્પષ્ટતા કરી કે આ એક સ્ટોપ-ગેપ માપદંડ છે જે રશિયન સરકારને કોઈ નોંધપાત્ર નાણાકીય લાભ આપશે નહીં, કારણ કે તે ફક્ત પ્રી-લોડેડ અને ફસાયેલા તેલના ડિલિવરીને આવરી લે છે. બેસન્ટે વધુમાં જણાવ્યું હતું કે, “આ વચગાળાની વ્યવસ્થા ઈરાનના વૈશ્વિક ઉર્જા પુરવઠાને બંધક બનાવવાના પ્રયાસોથી થતા દબાણને દૂર કરવામાં મદદ કરશે.” ભારત યુનાઇટેડ સ્ટેટ્સનો એક મહત્વપૂર્ણ ભાગીદાર છે, અને અમે સંપૂર્ણ અપેક્ષા રાખીએ છીએ કે નવી દિલ્હી યુનાઇટેડ સ્ટેટ્સ પાસેથી તેની તેલ ખરીદીમાં વધારો કરશે.
યુનાઇટેડ સ્ટેટ્સ પહેલાથી જ રશિયા સામે કડક પ્રતિબંધોની નીતિ જાળવી રાખે છે, પરંતુ આ મર્યાદિત અને ટૂંકા ગાળાની રાહત આપવામાં આવી છે, જે વર્તમાન ભૂ-રાજકીય કટોકટીમાં વૈશ્વિક ઉર્જા સુરક્ષાને પ્રાથમિકતા આપે છે. ટ્રેઝરી વિભાગ તરફથી આ મુક્તિ ભારતીય રિફાઇનરીઓ (જેમ કે આઇઓસી,બીપીસીએલ,એચપીસીએલ વગેરે) ને ફસાયેલા રશિયન ક્રૂડ ખરીદવાનું ચાલુ રાખવાની મંજૂરી આપશે, જે તેલના ભાવ પર વધારાનું દબાણ ઘટાડી શકે છે અને સ્થાનિક ઇંધણ પુરવઠાને અસર થતી અટકાવી શકે છે. આ પગલાને ભારત-યુએસ ઉર્જા સહયોગને મજબૂત કરવાના પગલા તરીકે પણ જાવામાં આવે છે, વોશિંગ્ટનને આશા છે કે ભારત યુએસ તેલ આયાત વધારશે.
મધ્ય પૂર્વમાં તણાવ બાદ, બજારોએ ખાસ કરીને હોર્મુઝ સ્ટ્રેટ પર ધ્યાન કેન્દ્રિત કર્યું છે, જે એક મહત્વપૂર્ણ દરિયાઈ માર્ગ છે જે વૈશ્વિક તેલ પુરવઠાના લગભગ પાંચમા ભાગનું વહન કરે છે. અહેવાલો અનુસાર, ઈરાને પડોશી દેશોમાં યુનાઈટેડ આરબ અમીરાત, બહેરીન, કુવૈત, કતાર, સાઉદી અરેબિયા, જાર્ડન, ઈરાક અને સીરિયા સહિત અમેરિકાની સંપત્તિઓને નિશાન બનાવીને હુમલા કર્યા છે.
