ઉત્તરપશ્ચિમ પાકિસ્તાનમાં પોલિયો રસીકરણ કાર્યકરોની રક્ષા કરી રહેલા પોલીસકર્મીઓ પર હુમલો કરવામાં આવ્યો છે. અફઘાનિસ્તાનની સરહદે આવેલા ખૈબર પખ્તુનખ્વા પ્રાંતના મોહમ્મદ જિલ્લામાં ઘરે ઘરે જઈને રસીકરણ કરી રહેલા બે પોલીસકર્મીઓની મોટરસાયકલ પર આવેલા શંકાસ્પદ આતંકવાદીઓએ ગોળી મારીને હત્યા કરી દીધી. ગોળીબારમાં અન્ય એક પોલીસકર્મી પણ ઘાયલ થયો હતો.
પોલીસ અધિકારી અયાઝ ખાને જણાવ્યું હતું કે પોલીસકર્મીઓ રસીકરણ ટીમોનું રક્ષણ કરવા માટે નજીકના ગામમાં જઈ રહ્યા હતા ત્યારે તેમના પર ગોળીબાર કરવામાં આવ્યો. ગોળીબાર પછી તરત જ હુમલાખોરો ઘટનાસ્થળેથી ભાગી ગયા. કોઈ જૂથે તાત્કાલિક હુમલાની જવાબદારી લીધી નથી.
પોલીસ અધિકારીએ જણાવ્યું હતું કે પાકિસ્તાની તાલિબાન અને અન્ય આતંકવાદી જૂથો નિયમિતપણે પોલિયો નાબૂદી અભિયાનો અને આરોગ્ય કર્મચારીઓના રક્ષણ માટે તૈનાત પોલીસ કર્મચારીઓને નિશાન બનાવે છે. તેઓ ખોટો દાવો કરે છે કે પોલિયો રસીકરણ અભિયાન બાળકોને વંધ્યત્વ આપવાના પશ્ચિમી કાવતરાનો ભાગ છે.
રસીકરણ અભિયાન પર જતા આરોગ્ય કર્મચારીઓ ઘણીવાર અફવાઓ ફેલાવવાની સમસ્યાનો સામનો કરે છે કે રસીકરણ અભિયાન મુસ્લીમ બાળકોને નપુંસક બનાવવાનું પશ્ચિમી કાવતરું છે. આનાથી રસીકરણ ટીમ સામે વિરોધ થાય છે.
ઇસ્લામાબાદમાં, પાકિસ્તાનના ગૃહમંત્રી મોહસીન નકવીએ હુમલાને “અસહ્ય” ગણાવ્યો અને માર્યા ગયેલા પોલીસકર્મીઓના પરિવારો પ્રત્યે સંવેદના વ્યક્ત કરી. તેમણે કહ્યું કે પોલીસકર્મીઓ દેશના સ્વસ્થ ભવિષ્ય માટે કામ કરી રહ્યા છે.
પાકિસ્તાને સોમવારે ૨૪ મિલિયન બાળકોને પોલિયો નાબૂદ કરવાના પ્રયાસોના ભાગ રૂપે પોલિયો સામે રસી આપવા માટે રાષ્ટ્રવ્યાપી અભિયાન શરૂ કર્યું. વિશ્વ આરોગ્ય સંગઠન અનુસાર, પાકિસ્તાન અને પડોશી અફઘાનિસ્તાન વિશ્વના એકમાત્ર એવા દેશો છે જ્યાં પોલિયો વાયરસ સ્થાનિક છે. સરકાર હજુ પણ અહીં પોલિયો સામે લડી રહી છે.
પાકિસ્તાન હજુ સુધી પોલિયો મુક્ત નથી. જોકે, વર્તમાન પરિસ્થીતિ જોતાં, એવું લાગે છે કે અહીં પોલિયો નાબૂદ કરવા માટે કામ કરવાનો અર્થ પોતાના જીવને જોખમમાં મૂકવાનો છે. ગયા વર્ષે, ખૈબર પખ્તુનખ્વા પ્રાંતમાં, અજાણ્યા બંદૂકધારીઓએ બે પોલિયો રસીકરણ કર્મચારીઓનું અપહરણ કર્યું હતું.
