ઈરાન-અમેરિકન કરાર પર મિશ્ર પ્રતિક્રિયાઓ આવી છે, કોંગ્રેસે પણ આ બાબતે પ્રતિક્રિયા આપી છે. કોંગ્રેસના મહાસચિવ જયરામ રમેશે સોમવારે કહ્યું કે અમેરિકા અને ઈરાન કરાર પર હસ્તાક્ષર કરશે તેવા સમાચાર આવકાર્ય છે, જાકે સંપૂર્ણ વિગતો હજુ સુધી સત્તાવાર રીતે જાહેર કરવામાં આવી નથી. દરેકને આશા છે કે બંને દેશો, તેમજ ઇઝરાયલ, કરારનું પાલન કરશે. જયરામ રમેશે એમ પણ કહ્યું હતું કે હોર્મુઝ સ્ટ્રેટ ખુલવાથી ભારતને રાહત મળશે, પરંતુ તેનો અર્થ એ નથી કે આર્થિક સમસ્યાઓ દૂર થશે.
એકસ પર પોસ્ટ કરતા, જયરામ રમેશે લખ્યું હતું કે હોર્મુઝ સ્ટ્રેટને પ્રતિબંધો વિના ફરીથી ખોલવાથી ભારતને ચોક્કસપણે નોંધપાત્ર રાહત મળશે. પરંતુ આનો અર્થ એ નથી કે આર્થિક સમસ્યાઓ ટૂંક સમયમાં દૂર થઈ જશે. આ ચિંતાઓ પશ્ચિમ એશિયામાં વર્તમાન યુદ્ધ પહેલાની છે, જે વડા પ્રધાન મોદીની ઇઝરાયલ મુલાકાતના માત્ર બે દિવસ પછી શરૂ થઈ હતી. રૂપિયો એક વર્ષથી વધુ સમયથી નોંધપાત્ર દબાણ હેઠળ હતો, અને ડોલરની માંગ અને પુરવઠા વચ્ચેનું અંતર વધતું રહ્યું હતું.
જયરામ રમેશે મોદી સરકાર પર પણ નિશાન સાધતા કહ્યું કે રોકાણ દર ધીમા રહ્યા છે. તેમણે આ પાછળના કારણો પણ સૂચિબદ્ધ કર્યા. તેમણે કહ્યું કે છેલ્લા દાયકામાં વાસ્તવિક વેતન સ્થીર થયું છે. મોદી સરકાર ચીનથી થતી આયાતના ડમ્પીગને રોકવામાં નિષ્ફળ ગઈ છે, જેના પરિણામે રેકોર્ડ વેપાર ખાધ થઈ છે. કોંગ્રેસના મહાસચિવે આરોપ લગાવ્યો કે કર અધિકારીઓ અને તપાસ એજન્સીઓને આપવામાં આવેલી અનિયંત્રિત સત્તાઓને કારણે એકંદર રોકાણ વાતાવરણ બગડ્યું છે.
પાકિસ્તાનનો ઉલ્લેખ કરતા, જયરામ રમેશે કહ્યું કે નવેમ્બર ૨૦૦૮ ના મુંબઈ આતંકવાદી હુમલા પછી ભારતે સફળતાપૂર્વક અલગ કરી દીધેલા પાકિસ્તાને હવે નવો પ્રાદેશિક અને વૈશ્વીક પ્રભાવ મેળવ્યો હોય તેવું લાગે છે. આ પરિસ્થીતિ, પાકિસ્તાનના વ્યૂહાત્મક માળખામાં ચીનના ઊંડા પ્રવેશ સાથે જાડાયેલી, ભારતની વિદેશ નીતિ માટે ગંભીર ભૂ-રાજકીય પડકાર ઉભો કરે છે. પીએમ મોદી ઇઝરાયલ પ્રત્યેની તેમની આંધળી નિષ્ઠા અને બિનશરતી સમર્થન પર પુનર્વિચાર કરે તેવી અપેક્ષા રાખવી વધુ પડતી હશે. પરંતુ માનવતાવાદી વિચારણાઓ અને લાંબા સમયથી ચાલતી પ્રતિબદ્ધતાઓથી આગળ, આપણા રાષ્ટ્રીય હિત માટે સંતુલન જરૂરી છે જે પીએમ મોદીએ દર્શાવ્યું નથી.
