જમ્મુ અને કાશ્મીરના રાજૌરીમાં ભારે વરસાદને કારણે પૂર આવ્યું છે. ઘણા વિસ્તારો પાણીમાં ડૂબી ગયા છે, જેનાથી સામાન્ય જનજીવન ખોરવાઈ ગયું છે. અધિકારીઓના જણાવ્યા અનુસાર, જમ્મુ અને કાશ્મીરના પૂંચ જિલ્લામાં રાતોરાત ભારે વરસાદને કારણે ચાર લોકોના મોત થયા છે અને ઘણા લોકો ગુમ છે.
જિલ્લા વહીવટીતંત્ર દ્વારા જનતાને બિનજરૂરી મુસાફરી ટાળવા અને નદીઓ, નાળાઓ અને પૂરગ્રસ્ત વિસ્તારોથી દૂર રહેવાની અપીલ કરવામાં આવી છે. નદી કિનારાની નજીક રહેતા લોકોને સતર્ક રહેવાની સલાહ આપવામાં આવી છે કારણ કે પાણીનું સ્તર સતત વધી રહ્યું છે.
પ્રતિકૂળ હવામાનને કારણે અમરનાથ યાત્રા પહેલાથી જ મુલતવી રાખવામાં આવી છે. પ્રતિકૂળ હવામાનની આગાહીને કારણે, શ્રી અમરનાથ યાત્રા પહેલગામ અને બાલતાલ બંને રૂટ પરથી ૧૯ જુલાઈ, ૨૦૨૬ સુધી અસ્થાયી રૂપે સ્થગિત કરવામાં આવી છે.
જમ્મુના ભગવતી નગર યાત્રી નિવાસ બેઝ કેમ્પનો એક વીડિયો પણ સામે આવ્યો છે. અમરનાથ યાત્રા બાદ, વૈષ્ણોદેવી યાત્રા પણ મુલતવી રાખવામાં આવી છે.ભારે વરસાદ અને પૂરને કારણે સ્થાનિક લોકો મુશ્કેલીઓનો સામનો કરી રહ્યા છે. એક સ્થાનિક રહેવાસીએ કહ્યું, “બધું જ ગયું છે; બધું જ ગયું છે. અમારી પાસે જે કંઈ હતું તે બધું ધોવાઈ ગયું છે. એક મહિલા ગુમ છે.”
અન્ય એક સ્થાનિક રહેવાસીએ જણાવ્યું હતું કે, “ઘણું નુકસાન થયું છે. લગભગ ૨૦૦ થી ૨૫૦ કાર ગુમ છે. આ ઘટના સવારે ૩ વાગ્યાની આસપાસ બની હતી. બસ સ્ટેન્ડનો કોઈ પત્તો બાકી નથી.અન્ય એક સ્થાનિક રહેવાસીએ જણાવ્યું હતું કે, “પૂર પહેલાં, ઓછામાં ઓછા ૩૦૦-૪૦૦ વાહનો અહીં પાર્ક કરેલા હતા, અને તે બધા રાતોરાત તણાઈ ગયા હતા. અમે વહીવટીતંત્રને વિનંતી કરીએ છીએ કે ઓછામાં ઓછા અહીં રહેલા વાહનોને દૂર કરવા માટે જેસીબી અથવા ક્રેન મોકલવામાં આવે. અમે વહીવટીતંત્રને આ મુશ્કેલ સમયમાં લોકોને મદદ કરવા અપીલ કરીએ છીએ. પૂરની સ્થિતિ ગંભીર છે; વરસાદ હજુ પણ બંધ થયો નથી.”
રાજૌરી જિલ્લામાં ભારે વરસાદને કારણે અચાનક પૂર આવ્યું, જેના કારણે ધારહલ નદી ઓવરફ્લો થઈ ગઈ અને નવા બસ સ્ટેન્ડ બેલા વિસ્તારમાં ફેલાઈ ગઈ. બસ સ્ટેન્ડ પર પાર્ક કરેલા ઘણા વાહનોને નુકસાન થયું કારણ કે પૂરનું પાણી પા‹કગ વિસ્તારમાં ઘૂસી ગયું.
