અમદાવાદની આગામી રથયાત્રા આ વર્ષે સુરક્ષા અને ટેકનોલોજીના સમન્વય સાથે યોજાવા જઈ રહી છે. પરંપરાગત રીતે રથયાત્રામાં ગજરાજાનું વિશેષ મહત્વ હોય છે, પરંતુ આ વખતે તેમની સુરક્ષા માટે વહીવટી તંત્ર દ્વારા ‘સ્માર્ટ ટ્રેકિંગ’ સિસ્ટમનો નિર્ણય લેવામાં આવ્યો છે. આધુનિક ટેકનોલોજી દ્વારા ભગવાનની શોભાયાત્રામાં સામેલ દરેક ગજરાજ પર ચાંપતી નજર રાખવામાં આવશે.
રથયાત્રાના રૂટ પર ગજરાજની મુવમેન્ટ ટ્રેક કરવા માટે દરેક હાથીની અંબાડી પર અત્યાધુનિક જીપીએસ સિસ્ટમ બેસાડવામાં આવશે. આ સિસ્ટમ માત્ર લોકેશન જ નહીં, પરંતુ ગજરાજની ગતિવિધિઓ પર પણ સતત દેખરેખ રાખશે. આ સિસ્ટમમાં ૩૬૦-ડિગ્રી કેમેરા પણ સામેલ હશે, જેનું લાઈવ ફીડ સીધું પોલીસ કંટ્રોલરૂમ સુધી પહોંચાડવામાં આવશે. આ પગલાંનો મુખ્ય ઉદ્દેશ્ય રથયાત્રા દરમિયાન કોઈપણ પ્રકારની અનિચ્છનીય ઘટનાઓને રોકવાનો અને ભીડમાં ગજરાજની સ્થિતિ જાણીને તુરંત પ્રતિસાદ આપવાનો છે.
વધુમાં, ગજરાજની આસપાસના અવાજના સ્તરને માપવા માટે અંબાડી પર ખાસ સેન્સિંગ મશીન પણ લગાવવામાં આવશે, જેથી ઘોંઘાટના કારણે હાથી ઉત્તેજિત ન થાય તેનું ધ્યાન રાખી શકાય. આ વર્ષે કુલ ૧૮ ગજરાજ પર આ પ્રકારના ડિજિટલ ઉપકરણો લગાડવામાં આવશે. તંત્ર દ્વારા લેવાયેલ આ નિર્ણય માત્ર સુરક્ષાની દૃષ્ટિએ જ નહીં, પરંતુ પ્રાણીઓની સંભાળ માટે પણ એક પ્રશંસનીય ડગલું માનવામાં આવે છે. ટેકનોલોજીના ઉપયોગથી આ વર્ષની રથયાત્રા વધુ સુરક્ષિત અને વ્યવસ્થિત બનશે તેવી આશા સેવાઈ રહી છે.
