વિદેશમાં નોકરી મેળવવાની ઈચ્છા ધરાવતા લોકો સાથે છેતરપિંડીના કિસ્સાઓ સામે આવી રહ્યા છે. આવો જ એક કિસ્સો વડોદરામાં સામે આવ્યો છે, જ્યાં અમેરિકાની વર્ક પરમિટ અપાવવાના બહાને નડિયાદની ૩૦ વર્ષીય મહિલા પાસેથી કુલ ૫.૭૭ લાખ લેવામાં આવ્યા હોવાનો આરોપ છે. કામ ન થતાં આરોપીએ ૧ લાખ પરત કર્યા, પરંતુ બાકીના ૪.૭૭ લાખ પરત ન કરતાં મહિલાએ પોલીસ ફરિયાદ નોંધાવી છે.આ મામલે ગોરવા પોલીસ સ્ટેશનમાં બ્લોસમ ગ્રુપના સંચાલક હેમલ ઉર્ફે રૂદ્ર ઉર્ફે ભયલુ નરેન્દ્ર પટેલ સામે છેતરપિંડીની ફરિયાદ નોંધાઈ છે. ફરિયાદના આધારે પોલીસે તપાસ શરૂ કરી છે.ફરિયાદ મુજબ, નડિયાદમાં રહેતી ૩૦ વર્ષીય પૂજા દેસાઈ વિદેશમાં નોકરી મેળવવા માટે યોગ્ય વિઝા કન્સલ્ટન્સીની શોધ કરી રહી હતી. આ દરમિયાન તેમની નજર બ્લોસમ ગ્રુપની જાહેરાત પર પડી હતી. જાહેરાતમાં આપેલા મોબાઇલ નંબર પર સંપર્ક કર્યા બાદ હેમલ પટેલે તેમને વડોદરાના ગેંડા સર્કલ નજીક આવેલી બ્લોસમ ગ્રુપની ઓફિસમાં બોલાવ્યા હતા. અહીં અમેરિકાની વર્ક પરમિટ મેળવવા માટે આશરે ૮ લાખનો ખર્ચ થશે અને શરૂઆતમાં ?૬ લાખ ચૂકવવાના રહેશે તેવી વાત કરવામાં આવી હોવાનો ફરિયાદમાં ઉલ્લેખ છે.
ફરિયાદ મુજબ, પૂજા દેસાઈએ ડિસેમ્બર ૨૦૨૫થી જાન્યુઆરી ૨૦૨૬ દરમિયાન અલગ-અલગ હપ્તામાં કુલ ?૫.૭૭ લાખ બ્લોસમ ગ્રુપના બેંક ખાતામાં જમા કરાવ્યા હતા. રકમ લીધા બાદ આરોપીએ આશરે ત્રણ મહિનામાં અમેરિકાની વર્ક પરમિટનું કામ પૂર્ણ થઈ જશે તેવી ખાતરી આપી હતી. આથી ફરિયાદી મહિલાએ પ્રક્રિયા પૂર્ણ થવાની રાહ જાઈ હતી.ત્રણ મહિનાનો સમય પસાર થયા બાદ પણ અમેરિકાની વર્ક પરમિટ અંગે કોઈ પ્રગતિ ન થતાં મહિલાએ આરોપીનો સંપર્ક કર્યો હતો. ત્યારે કામ ચાલી રહ્યું હોવાનું કહીને વધુ સમય માંગવામાં આવ્યો હોવાનો ફરિયાદમાં આક્ષેપ છે. આ રીતે સમય પસાર થતો રહ્યો, પરંતુ અંતે મહિલાને શંકા જતાં તે બ્લોસમ ગ્રુપની ઓફિસે પહોંચી હતી.ફરિયાદી મહિલા જ્યારે ગેંડા સર્કલ નજીક આવેલી બ્લોસમ ગ્રુપની ઓફિસે પહોંચી ત્યારે ઓફિસ બંધ હોવાનું જાણવા મળ્યું હતું. ત્યારબાદ તેમણે વધુ તપાસ કરતાં અન્ય લોકોને પણ વિદેશ મોકલવાના નામે નાણાં લેવામાં આવ્યા હોવાની અને બાદમાં ઓફિસ બંધ કરી દેવામાં આવી હોવાની જાણ થઈ હોવાનું ફરિયાદમાં જણાવાયું છે. આ ઘટનાથી મહિલાને પોતાની સાથે પણ છેતરપિંડી થઈ હોવાની શંકા વધુ મજબૂત બની હતી.
ફરિયાદી મહિલાએ આરોપીનો વારંવાર સંપર્ક કરી પોતાના પૈસા પરત માંગ્યા હતા. ત્યારબાદ આરોપીએ ૧ લાખ પરત કર્યા હોવાનું ફરિયાદમાં જણાવાયું છે. જાકે, બાકીના ૪.૭૭ લાખ પરત કરવામાં આવ્યા ન હતા. આખરે મહિલાએ ગોરવા પોલીસ સ્ટેશનમાં ફરિયાદ નોંધાવી હતી.ફરિયાદના આધારે ગોરવા પોલીસે હેમલ પટેલ સામે છેતરપિંડીની ફરિયાદ નોંધી તપાસ હાથ ધરી છે. પોલીસે ફરિયાદમાં જણાવેલી રકમની લેવડદેવડ, બેંક ખાતાની વિગતો, કન્સલ્ટન્સીની કામગીરી તેમજ અન્ય લોકો પાસેથી પણ આ પ્રકારની રકમ લેવામાં આવી હતી કે નહીં તે સહિતના મુદ્દે તપાસ શરૂ કરી છે. હાલ આ કેસમાં ફરિયાદીના આક્ષેપો અને પોલીસ ફરિયાદના આધારે કાર્યવાહી ચાલી રહી છે. તપાસ પૂર્ણ થયા બાદ સમગ્ર મામલામાં વધુ હકીકતો સામે આવી શકે છે.
