સોમવારે સવારે મધ્યપ્રદેશની રાજધાની ભોપાલના ખજુરી રોડ પોલીસ સ્ટેશન વિસ્તારમાં મહિલા આરટીઓ ઇન્સ્પેક્ટરની હત્યાનો મામલો પ્રકાશમાં આવ્યો. ૪૫ વર્ષીય મીનાક્ષી ગોખલેનો મૃતદેહ તેના ઘરમાં લોહીથી લથપથ મળી આવ્યો હતો. પોલીસના જણાવ્યા અનુસાર, તેના પ્રેમી પવન કુમાર દ્વિવેદીએ કથિત રીતે હથોડીથી માથા પર માર મારીને તેની હત્યા કરી હતી. ઘટના બાદ પવને ઘરથી થોડે દૂર એક ઝાડ પર ફાંસી લગાવી લીધી હતી.
આ ઘટના ભંવરી જાડ Âસ્થત લેખપાલ કોલોનીમાં બની હતી. મીનાક્ષીના રૂમમેટે સોમવારે સવારે ૭ વાગ્યાની આસપાસ પોલીસને ઘટનાની જાણ કરી હતી. માહિતી મળતાં, એક વરિષ્ઠ પોલીસ ટીમ અને એફએસએલ ટીમ ઘટનાસ્થળે પહોંચી અને પુરાવા એકત્રિત કર્યા. પોલીસે ઘટનાસ્થળેથી લોહીથી લથપથ હથોડી પણ જપ્ત કરી.
પોલીસના જણાવ્યા અનુસાર, સીધીનો રહેવાસી પવન કુમાર દ્વિવેદી બે દિવસ પહેલા ઇન્દોરથી ભોપાલ આવ્યો હતો અને મીનાક્ષીના ઘરે રહેતો હતો. પ્રાથમિક તપાસમાં જાણવા મળ્યું છે કે રવિવારે મોડી રાત્રે બંને વચ્ચે લગ્નને લઈને ઝઘડો થયો હતો. શંકા છે કે ઝઘડા દરમિયાન પવને મીનાક્ષીના માથા પર હથોડાથી અનેક વાર માર્યા હતા, જેના કારણે તેનું મોત નીપજ્યું હતું. ત્યારબાદ તેણે ઘરથી લગભગ ૨૦ મીટર દૂર એક ઝાડ પર લટકીને આત્મહત્યા કરી લીધી હતી. પ્રાથમિક તપાસમાં પોલીસને જાણવા મળ્યું કે પવન અગાઉ ઇન્દોરમાં કોચિંગ ક્લાસ ચલાવતો હતો અને હાલમાં સ્પર્ધાત્મક પરીક્ષાઓની તૈયારી કરી રહ્યો હતો. પોલીસે તેના ખિસ્સામાંથી બેંક પાસબુક પણ મળી આવી છે. એવું કહેવામાં આવી રહ્યું છે કે પવન મીનાક્ષી પર લગ્ન કરવા માટે દબાણ કરી રહ્યો હતો, પરંતુ મીનાક્ષી તેના માટે તૈયાર નહોતી. પોલીસ હાલમાં આ વિવાદને હત્યાના કારણ તરીકે તપાસ કરી રહી છે.
