જેલમાં બંધ ગેંગસ્ટર લોરેન્સ બિશ્નોઈના નાના ભાઈ અને અભિનેતા સલમાન ખાનના બાંદ્રા નિવાસસ્થાન બહાર ૨૦૨૪ માં થયેલી ગોળીબારની ઘટનાના વોન્ટેડ આરોપી અનમોલ બિશ્નોઈએ મુંબઈની ખાસ મહારાષ્ટ્ર કંટ્રોલ ઓફ ઓર્ગેનાઇઝ્ડ ક્રાઇમ એક્ટ કોર્ટ સમક્ષ આત્મસમર્પણની પરવાનગી માંગતી અરજી દાખલ કરી હતી. પોતાની અરજીમાં, અનમોલે જણાવ્યું હતું કે તે “ચાલુ ટ્રાયલનો સામનો કરવા અને ન્યાયિક કાર્યવાહીમાં ભાગ લેવા માટે” મુંબઈ કોર્ટ સમક્ષ સ્વેચ્છાએ આત્મસમર્પણ કરવા માંગે છે.
અનમોલ બિશ્નોઈ હાલમાં નવી દિલ્હીની તિહાર જેલમાં બંધ છે. નવેમ્બર ૨૦૨૫ માં તેને યુનાઇટેડ સ્ટેટ્સથી ભારત પ્રત્યાર્પણ કરવામાં આવ્યો હતો. ભારતમાં પહોંચ્યા પછી, રાષ્ટ્રીય તપાસ એજન્સીએ તેને લોરેન્સ બિશ્નોઈ સિન્ડીકેટ સાથે જાડાયેલા કથિત આતંકવાદી-ગેંગસ્ટર સાંઠગાંઠ સંબંધિત કેસમાં ધરપકડ કરી હતી.
ખાસ ન્યાયાધીશ એસ.આર. નવેન્દ્રે સરકારી વકીલને અનમોલ વતી દાખલ કરાયેલી અરજી પર પોતાનો જવાબ દાખલ કરવાનો નિર્દેશ આપ્યો. અરજીમાં જણાવાયું છે કે અનમોલ એનઆઇએ કેસમાં પહેલાથી જ ન્યાયિક કસ્ટડીમાં હોવા છતાં, યોગ્ય સૂચનાઓ વિના તે મુંબઈ કોર્ટ સમક્ષ રૂબરૂ હાજર થઈ શકતો નથી. તેણે તિહાર જેલ પ્રશાસનના નામે પ્રોડક્શન વોરંટ જારી કરવાની માંગ કરી છે જેથી તેના શરણાગતિ ઔપચારિક રીતે નોંધી શકાય અને જરૂરી રિમાન્ડ કાર્યવાહી, ભૌતિક રીતે કે વર્ચ્યુઅલ રીતે, પૂર્ણ કરી શકાય.
અરજીમાં જણાવાયું છે કે જો આ રાહત આપવામાં આવે છે, તો ફરિયાદ પક્ષને કોઈ નુકસાન થશે નહીં. તેનાથી વિપરીત, તે કાર્યવાહીને ઝડપી બનાવશે અને કાનૂની પ્રક્રિયાના કોઈપણ દુરુપયોગને અટકાવશે. અરજીમાં એમ પણ કહેવામાં આવ્યું છે કે ફાયરિંગ કેસમાં ટ્રાયલ પહેલાથી જ ચાલી રહી છે અને તેની ગેરહાજરીમાં ફરિયાદ પક્ષના ત્રણ સાક્ષીઓના નિવેદનો નોંધવામાં આવ્યા છે.
૧૪ એપ્રિલ, ૨૦૨૪ ના રોજ, બે મોટરસાઇકલ સવાર હુમલાખોરોએ બાંદ્રામાં સલમાન ખાનના ગેલેક્સી એપાર્ટમેન્ટની બહાર કથિત રીતે ગોળીબાર કર્યો હતો અને પછી ઘટનાસ્થળેથી ભાગી ગયા હતા. મુંબઈ પોલીસે આ કેસમાં એમસીઓસીએ લાગુ કર્યો હતો અને આરોપ લગાવ્યો હતો કે આ હુમલો લોરેન્સ બિશ્નોઈ ગેંગ દ્વારા કાવતરું ઘડવામાં આવ્યું હતું. શૂટર્સ વિક્કી ગુપ્તા અને સાગર પાલ, સોનુ કુમાર બિશ્નોઈ, મોહમ્મદ રફીક ચૌધરી અને હરપાલ સિંહ સાથે, આ કેસમાં ટ્રાયલનો સામનો કરી રહ્યા છે અને ન્યાયિક કસ્ટડીમાં છે. આ કેસના અન્ય આરોપી, અનુજ કુમાર થાપનનું પોલીસ કસ્ટડીમાં મૃત્યુ થયું હતું. આ કેસમાં લોરેન્સ બિશ્નોઈ અને અનમોલ બિશ્નોઈને વોન્ટેડ આરોપી તરીકે નામ આપવામાં આવ્યા છે.
