પાંચ રાજ્યોમાં વિધાનસભા ચૂંટણીઓ પૂર્ણ થતાં, કર્ણાટક કોંગ્રેસમાં નેતૃત્વ પરિવર્તનની અટકળો તેજ થઈ ગઈ છે. ડેપ્યુટી સીએમ ડીકે શિવકુમારના તાજેતરના નિવેદનોએ અઢી વર્ષના સત્તા વહેંચણી કરારની અફવાઓને ફરીથી વેગ આપ્યો છે. શિવકુમારે ગુરુવારે કહ્યું હતું કે સમય જ કહેશે કે તેઓ રાજ્યના મુખ્યમંત્રી બનશે કે નહીં. શિવકુમારનું આ નિવેદન એવી અટકળો વચ્ચે આવ્યું છે કે કોંગ્રેસ હાઈકમાન્ડ ટૂંક સમયમાં નેતૃત્વ પરિવર્તન અને રાજ્ય મંત્રીમંડળમાં બહુપ્રતિક્ષિત ફેરબદલનો નિર્ણય લઈ શકે છે.
સિદ્ધારમૈયાની આગેવાની હેઠળની રાજ્ય કોંગ્રેસ સરકારે સત્તામાં ત્રણ વર્ષ પૂર્ણ કર્યા છે. એવી અપેક્ષા રાખવામાં આવે છે કે પાર્ટીનું ટોચનું નેતૃત્વ ટૂંક સમયમાં મુખ્યમંત્રી સિદ્ધારમૈયા અને પ્રદેશ કોંગ્રેસ પ્રમુખ શિવકુમારને નવી દિલ્હી બોલાવી શકે છે જેથી મુખ્યમંત્રી પદ અંગે ચાલી રહેલા ઝઘડાનો ઉકેલ લાવી શકાય.
ચામરાજનગરમાં પત્રકારો દ્વારા મુખ્યમંત્રી બનવા અંગે પૂછવામાં આવતા શિવકુમારે કહ્યું, “સમય કહેશે.” શિવકુમારના સમર્થકો આગ્રહ કરી રહ્યા છે કે જા પાર્ટી ૨૦૨૩ ની વિધાનસભા ચૂંટણી જીતે તો મુખ્યમંત્રી સિદ્ધારમૈયા સાથેના કથિત સત્તા-વહેંચણી કરાર અનુસાર તેમને રાજ્ય સરકારની કમાન સોંપવામાં આવે.
કર્ણાટકમાં રાજકીય ચર્ચા વધી રહી છે કે જ્યારે ૨૦૨૩ માં રાજ્યમાં કોંગ્રેસની સરકાર બની ત્યારે હાઇકમાન્ડ સિદ્ધારમૈયા અને ડીકે શિવકુમાર વચ્ચે ગુપ્ત સત્તા-વહેંચણી ફોર્મ્યુલા પર સંમત થયા હતા. હવે જ્યારે પાંચ રાજ્યોમાં વિધાનસભાની ચૂંટણીઓ યોજાઈ ગઈ છે અને કેરળમાં આંતરિક મુદ્દાઓ ઉકેલાઈ ગયા છે, ત્યારે શિવકુમારના સમર્થકો ઇચ્છે છે કે પાર્ટી હાઇકમાન્ડ પોતાનું વચન પૂર્ણ કરે.
નાયબ મુખ્યમંત્રીએ પોતે તેમના નિવેદનમાં જણાવ્યું હતું કે તેઓ પાર્ટીના વફાદાર સૈનિક છે અને હાઇકમાન્ડ જે પણ નિર્દેશ આપશે તેનું પાલન કરશે. જા કે, આ સંયમિત નિવેદન એક ઊંડો રાજકીય સંદેશ છુપાવે છે, જેનાથી સિદ્ધારમૈયા છાવણીમાં ખળભળાટ મચી ગયો છે. આવી સ્થિતિમાં, જા કોંગ્રેસ હાઈકમાન્ડ સમયસર આ સંઘર્ષનો ઉકેલ નહીં લાવે, તો કર્ણાટકમાં કોંગ્રેસ સરકાર માટે આગળનો રસ્તો ખૂબ જ પડકારજનક બની શકે છે.
