પશ્ચિમ બંગાળ વિધાનસભા ચૂંટણી હાર્યા બાદ, તૃણમૂલ કોંગ્રેસ (ટીએમસી) એ એક મોટી જાહેરાત કરી છે. ટીએમસીએ વિધાનસભામાં વિપક્ષના નેતા તરીકે ધારાસભ્ય શોભનદેવ ચટ્ટોપાધ્યાયની જાહેરાત કરી છે. ટીએમસીના સૌથી અનુભવી નેતાઓ અને સ્થાપકોમાંના એક ચટ્ટોપાધ્યાયને ગૃહમાં નવી જવાબદારીઓ સોંપવામાં આવી છે. ટીએમસીએ આસિમા પાત્રા અને નયના બંદોપાધ્યાયને વિપક્ષના ઉપનેતા તરીકે પણ નિયુક્ત કર્યા છે. ધારાસભ્ય ફિરહાદ હકીમ વિપક્ષના મુખ્ય દંડક તરીકે પણ સેવા આપશે.
તાજેતરની ચૂંટણીઓમાં ભાજપે પ્રચંડ વિજય મેળવ્યો હતો, અને સુવેન્દુ અધિકારીએ મુખ્યમંત્રી તરીકે શપથ લીધા હતા. ત્યારબાદ, ટીએમસીએ ગૃહમાં તેની ભૂમિકાને વ્યાખ્યાયિત કરતા આ નામોની જાહેરાત કરી છે. મમતા બેનર્જીની ભૂમિકા અંગેનું ચિત્ર અસ્પષ્ટ છે. પક્ષની હાર બાદ, તેમણે વિધાનસભામાં હાજરી આપવાનો ઇનકાર કર્યો છે, ભાજપ અને ચૂંટણી પંચ પર ગંભીર આરોપો લગાવ્યા છે. એવું માનવામાં આવે છે કે મમતા બેનર્જી તેમના નિવેદન પર અડગ રહેશે અને આગામી દિવસોમાં વિધાનસભામાં હાજરી આપવાનું ટાળશે.
હકીકતમાં, ૮૨ વર્ષીય શોભનદેવ ચટ્ટોપાધ્યાય જાન્યુઆરી ૧૯૯૮ માં પાર્ટીની સ્થાપનાથી જ તૃણમૂલ કોંગ્રેસ સાથે જાડાયેલા છે. તેમને રાજ્યના રાજકારણમાં એક અનુભવી નેતા માનવામાં આવે છે. મમતા બેનર્જીએ ઘણીવાર પક્ષના નિર્ણયો પર ચટ્ટોપાધ્યાયની સલાહ લીધી છે. આ વખતે, મમતાએ વિપક્ષમાં બેસીને સરકાર સામે લડવું પડે છે. આ માટે, તેમણે તેમના સૌથી અનુભવી નેતાને મેદાનમાં ઉતાર્યા છે.
૪ મેના રોજ જાહેર થયેલા ચૂંટણી પરિણામોમાં, મમતા બેનર્જીએ ટીએમસી સાથે મળીને તેમની પરંપરાગત બેઠક, ભવાનીપુર, સુવેન્દુ અધિકારી સામે હારી ગઈ. આ હાર પછી આ તેમનો પહેલો જાહેર દેખાવ છે. આ દરમિયાન, મમતાએ ભાજપ વિરોધી દળોને એક થવાની અપીલ કરી. તેમણે કહ્યું, “હું તમામ ભાજપ વિરોધી દળો, વિદ્યાર્થી સંગઠનો અને એનજીઓને સંયુક્ત મોરચો બનાવવા માટે હાકલ કરું છું.” તેમણે ખાતરી આપી કે ટીએમસી ફરીથી ઉભરી આવશે.
મમતા બેનર્જીએ સ્પષ્ટતા કરી કે ભાજપ સામેની આ લડાઈમાં ડાબેરી મોરચાનું પણ સ્વાગત છે. મમતા હવે વિપક્ષી ગઠબંધનને મજબૂત કરવા માટે દરરોજ સાંજે ૪ થી ૬ વાગ્યા સુધી તેમના કાર્યાલયમાં ઉપલબ્ધ રહેશે. જાકે, સીપીઆઈ(એમ) નેતા મોહમ્મદ સલીમે આ અંગે કટાક્ષ કર્યો, રવિન્દ્રનાથ ટાગોરની પંક્તિઓ ટાંકીને કહ્યું કે મમતા તેમના સાથીઓને ત્યારે જ યાદ કરે છે જ્યારે સત્તા ખસી જાય છે.
