વેસ્ટર્ન સૌરાષ્ટ્ર પેસેન્જર એસોસિએશન દ્વારા ઉપલેટા ખાતે કેન્દ્રીય મંત્રી મનસુખ માંડવીયાને રેલવે સુવિધાઓ વધારવા માટે આવેદનપત્ર આપવામાં આવ્યું હતું. વાંસજાળીયા-જેતલસર રૂટ વર્ષ ૨૦૧૧ માં બ્રોડગેજમાં રૂપાંતરિત થયો હોવા છતાં ૧૬ વર્ષ પછી પણ અહીં લાંબા અંતરની ટ્રેનો શરૂ થઈ નથી. આ વિસ્તારના ૪૦૦ ગામોની ૧૮ લાખની વસ્તી માટે વર્તમાન સુવિધાઓ અપૂરતી છે, જેના કારણે લોકોને મોંઘી પ્રાઈવેટ બસોમાં મુસાફરી કરવી પડે છે. સંસ્થા દ્વારા પોરબંદર-મુંબઈ અને પોરબંદર-હરિદ્વાર નવી ટ્રેન શરૂ કરવા તેમજ પોરબંદર-સાન્ત્રાગાચી ટ્રેનના ફેરા વધારવા માંગ કરાઈ છે. આ ઉપરાંત જામજોધપુર અને ધોરાજી સ્ટેશનો પર ખૂટતો સ્ટાફ પૂરો કરવા, વધારાના કોચ જોડવા, અલગ રિઝર્વેશન વિન્ડો, ફૂટ ઓવરબ્રિજ, શેડ અને પ્લેટફોર્મ બદલવા જેવી સ્થાનિક સમસ્યાઓનો ત્વરિત ઉકેલ લાવવા રજૂઆત કરવામાં આવી છે.
