દેશમાં પેટ્રોલમાં ૨૦% ઇથેનોલ ભેળવવાની સરકારની મહત્વાકાંક્ષી યોજના ફરી એકવાર સમાચારમાં છે. મંગળવારે સુપ્રીમ કોર્ટમાં ઇથેનોલ ટેન્ડર કેસની સુનાવણી દરમિયાન, કેન્દ્ર સરકારે સ્પષ્ટતા કરી કે પેટ્રોલમાં ૨૦% ઇથેનોલ ભેળવવાનો નિર્ણય યથાવત છે. જાકે, કોર્ટ ઇથેનોલ સપ્લાય અને ફાળવણી અંગે ચાલી રહેલા વિવાદની સુનાવણી ચાલુ રાખશે. સરકારનું કહેવું છે કે આ એક મોટો પ્રયોગ છે, જેના પરિણામો આવતા વર્ષ સુધીમાં મળી શકે છે.
આ કેસ ભારત પેટ્રોલિયમ અને કેન્દ્ર સરકાર વચ્ચેના ઇથેનોલ ટેન્ડર વિવાદને લગતો છે. કર્ણાટક હાઇકોર્ટે ૨૦૨૫-૨૬ માટે ઇથેનોલ ફાળવણી પ્રક્રિયા ફરીથી ખોલવાનો આદેશ આપ્યો હતો. ભારત પેટ્રોલિયમે જણાવ્યું હતું કે આ સરકારની ૨૦% ઇથેનોલ મિશ્રણ યોજનાને અસર કરી શકે છે. સુપ્રીમ કોર્ટે આ મામલાની સુનાવણી કરી.
સુનાવણી દરમિયાન, એટર્ની જનરલ આર. વેંકટરામણીએ કોર્ટને માહિતી આપી હતી કે સરકાર પેટ્રોલમાં ૨૦% ઇથેનોલ મિશ્રણ કરવાની યોજના પર સતત કામ કરી રહી છે. તેમણે તેને એક મોટો રાષ્ટ્રીય પ્રયોગ ગણાવ્યો અને કહ્યું કે તેના વાસ્તવિક પરિણામો આવતા વર્ષ સુધીમાં અપેક્ષિત છે. તેમણે એમ પણ કહ્યું કે આ મુદ્દાને લગતા અસંખ્ય કેસ દેશભરની વિવિધ હાઇકોર્ટમાં પેન્ડિંગ છે. જા અલગ અલગ નિર્ણયો લેવામાં આવે છે, તો રાષ્ટ્રીય નીતિ પ્રભાવિત થઈ શકે છે. તેથી, કેન્દ્ર સરકાર બધા કેસોને એકસાથે સાંભળવા માટે ટ્રાન્સફર અરજી દાખલ કરવા માંગે છે.
કેન્દ્ર સરકારની દલીલો સાંભળ્યા પછી, સુપ્રીમ કોર્ટે આ મામલે નોટિસ જારી કરી અને આગામી સુનાવણી સુધી યથાસ્થિતિ જાળવી રાખવાનો નિર્દેશ આપ્યો. કોર્ટે એ પણ પૂછ્યું કે સરકારે પહેલા હાઇકોર્ટની ડિવિઝન બેન્ચનો સંપર્ક કેમ ન કર્યો. અરજદારનું પ્રતિનિધિત્વ કરતા વરિષ્ઠ વકીલ સિદ્ધાર્થ દવેએ કહ્યું કે ટ્રાન્સફર પિટિશન દાખલ કરવી એ ફક્ત કેસને વિલંબિત કરવાનો પ્રયાસ છે.
સુનાવણી પછી, એટર્ની જનરલે સ્પષ્ટતા કરી કે તેમનું નિવેદન ફક્ત ઇથેનોલના પુરવઠા અને ફાળવણી સાથે સંબંધિત છે. તેમણે જણાવ્યું હતું કે પેટ્રોલમાં ૨૦% ઇથેનોલ ભેળવવાની સરકારની નીતિમાં કોઈ ફેરફાર થયો નથી. જા કે, તેલ કંપનીઓને ઉપલબ્ધ ઇથેનોલની માત્રા માંગ, ઉપલબ્ધતા અને અન્ય પરિસ્થિતિઓના આધારે નક્કી કરવામાં આવશે.
