કર્ણાટકના મંડ્યા જિલ્લાના માલાવલ્લી તાલુકાના લોકપ્રિય પર્યટન સ્થળ મુથથી નજીક કાવેરી નદીમાં એક પરિવારના પાંચ સભ્યો ડૂબી ગયા. આ ઘટના બુધવારે સાંજે ૫ વાગ્યાની આસપાસ બની હતી. એવું કહેવામાં આવી રહ્યું છે કે તેઓ ફોટોગ્રાફી કરવા માટે પાણીમાં ઉતર્યા હતા. મૃતકોની ઓળખ ચૈત્ર (૨૦), પ્રિયંકા (૨૮), શ્વેતા (૩૮), વિજયમ્મા (૫૦) અને મહેશ તરીકે થઈ છે. પોલીસે જણાવ્યું હતું કે તેઓ બધા ચન્નાપટનાના બાયદરહલ્લીના રહેવાસી હતા.
પરિવાર પ્રખ્યાત મુત્તાથિરય મંદિરના દર્શન માટે મુત્તાથિ ગયો હતો. પ્રાર્થના કર્યા પછી, તેઓ નદી કિનારે ગયા. કાવેરી નદીમાં પ્રવેશ કરતી વખતે આ અકસ્માત થયો. એવું કહેવામાં આવી રહ્યું છે કે તેઓ ફોટોગ્રાફી કરી રહ્યા હતા અને બેદરકારીથી તણાઈ ગયા.
માહિતી મળતાં, હલાગુરુ પોલીસ સ્ટેશનના અધિકારીઓ તાત્કાલિક ઘટનાસ્થળે પહોંચ્યા. ફાયર અને બચાવ ટીમોએ તાત્કાલિક શોધખોળ શરૂ કરી અને થોડા જ સમયમાં પાંચેય મૃતદેહો બહાર કાઢ્યા. મંડ્યાના પોલીસ અધિક્ષક ડો. વી.જે. શોભારાણીએ ઘટનાસ્થળે મુલાકાત લીધી અને પુષ્ટિ કરી કે પીડિતોના મૃતદેહોને મંડ્યા ઇન્સ્ટીટયુટ આૅફ મેડિકલ સાયન્સ હોસ્પિટલમાં મોકલવામાં આવ્યા છે. હલાગુરુ પોલીસ સ્ટેશનમાં કેસ નોંધવામાં આવ્યો છે, અને વધુ તપાસ ચાલી રહી છે.
પોલીસે જણાવ્યું હતું કે આ અકસ્માત ત્યારે થયો જ્યારે વિજયમ્મા આકસ્મિક રીતે નદીના ઊંડા ભાગમાં લપસી ગઈ અને ડૂબવા લાગી. અન્ય મહિલાઓ તેને બચાવવા માટે એક પછી એક પાણીમાં ઉતરી ગઈ, પરંતુ જારદાર પ્રવાહમાં તેઓ તણાઈ ગયા. આ ઘટના વિશે વાત કરતા, વરિષ્ઠ પોલીસ અધિકારી શોભા રાનીએ જણાવ્યું હતું કે પરિવારની ચાર મહિલાઓ પાણી છીછરું હોવાનું માનીને ફોટોગ્રાફ લેવા માટે નદીમાં ઉતરી હતી. વિસ્તારમાં તૈનાત હોમગાર્ડ્સ તરફથી ચેતવણી છતાં, તેઓ નદીમાં ઉતરતા રહ્યા. તેમને બચાવવાનો પ્રયાસ કરનાર પરિવારના સભ્ય રવિને સ્થાનિકોએ બચાવી લીધો અને તે બચી ગયો. જૂથ સાથે રહેલો ચાર વર્ષનો બાળક પણ બચી ગયો.
