નવી દિલ્હીઃ વિપક્ષી જૂથની બેઠક બાદ, શાસક રાષ્ટ્રીય લોકશાહી જાડાણએ હવે એક મોટી બેઠક બોલાવી છે.એનડીએની બેઠક આવતીકાલે, બુધવારે, બપોરે ૩ઃ૦૦ વાગ્યે ભારત મંડપમ ખાતે યોજાશે. બધા એનડીએના નેતાઓ આ બેઠકમાં હાજરી આપશે. આ બેઠકમાં સરકારના ૧૨ વર્ષ પૂર્ણ થવા અંગે ચર્ચા કરવામાં આવશે.
વડાપ્રધાન નરેન્દ્ર મોદીના નેતૃત્વ હેઠળની એનડીએ સરકાર જૂન ૨૦૨૬માં સત્તામાં તેમનો ઐતિહાસિક ૧૨ વર્ષનો કાર્યકાળ પૂર્ણ કરશે. ૨૬ મે, ૨૦૧૪ના રોજ પ્રથમ વખત વડા પ્રધાન તરીકે શપથ લેનારા નરેન્દ્ર મોદીએ ૯ જૂન, ૨૦૨૪ના રોજ સતત ત્રીજા કાર્યકાળ માટે પદ સંભાળ્યું. ૯ જૂન, ૨૦૨૬ના રોજ તેમણે ૪,૩૯૮ દિવસ (૧૨ વર્ષ અને ૧૫ દિવસ) વડા પ્રધાન તરીકે પૂર્ણ કર્યા. આ સાથે, તેમણે ચૂંટણી જીત્યા પછી સ્વતંત્ર ભારતમાં સૌથી લાંબા કાર્યકાળનો રેકોર્ડ બનાવ્યો.
આ સંદર્ભમાં, તેમણે દેશના પ્રથમ વડા પ્રધાન પંડિત જવાહરલાલ નેહરુના રેકોર્ડને તોડી નાખ્યો. પંડિત નેહરુએ ૧૫ ઓગસ્ટ, ૧૯૪૭ થી ૨૭ મે, ૧૯૬૪ના રોજ તેમના મૃત્યુ સુધી કુલ ૬,૧૩૦ દિવસ વડા પ્રધાન તરીકે સેવા આપી હતી. જાકે, તેમણે દેશની પ્રથમ સામાન્ય ચૂંટણી પહેલા વચગાળાની સરકારનું નેતૃત્વ કરવામાં પ્રથમ પાંચ વર્ષ ગાળ્યા. ૧૯૫૨માં ચૂંટણી જીત્યા પછી જ્યારે તેઓ પ્રથમ ચૂંટાયેલા વડા પ્રધાન બન્યા, ત્યારે તેમનો કાર્યકાળ ૪,૩૯૭ દિવસ (૧૨ વર્ષ અને ૧૪ દિવસ) સુધી ચાલ્યો.
આ દરમિયાન, રાષ્ટ્રવાદી કોંગ્રેસ પાર્ટીના પ્રદેશ પ્રમુખ અને સાંસદ સુનીલ તટકરેએ માહિતી આપી છે કે ૧૦ જૂને નવી દિલ્હીમાં બોલાવાયેલી એનડીએ બેઠકને કારણે, પાર્ટીનો ૨૭મો સ્થાપના દિવસ કાર્યક્રમ ૧૧ જૂન સુધી મુલતવી રાખવામાં આવ્યો છે. આ કાર્યક્રમ પૂર્વનિર્ધારિત સ્થળ, મુંબઈના ષણ્મુખાનંદ હોલ ખાતે બપોરે ૨ઃ૦૦ વાગ્યે યોજાશે. એનડીએ ના ઘટક પક્ષોના નેતાઓ, મુખ્યમંત્રીઓ અને નાયબ મુખ્યમંત્રીઓ, જેમાં મહારાષ્ટ્રના નાયબ મુખ્યમંત્રી સુનેત્રા પવારનો પણ સમાવેશ થાય છે, દિલ્હીમાં આ મોટી બેઠકમાં હાજરી આપશે.
એનસીપી અજિત પવારના નિધન પછી પહેલી વાર તેનો સ્થાપના દિવસ ઉજવી રહી છે, જેમના અવસાન પછી સુનેત્રા પવારે રાષ્ટ્રીય અધ્યક્ષ અને નાયબ મુખ્યમંત્રી તરીકે સંગઠનને મજબૂત બનાવવાની જવાબદારી સંભાળી હતી. સુનીલ તટકરેએ જણાવ્યું હતું કે પાર્ટીનો ૨૭મો સ્થાપના દિવસ “સમર્પણ, સંઘર્ષ અને સંકલ્પ” ની થીમ હેઠળ ઉજવવામાં આવશે અને તે સંપૂર્ણપણે અજિત પવારની સ્મૃતિ અને તેમના આદર્શોને સમર્પિત રહેશે.
