કોંગ્રેસના વરિષ્ઠ નેતા અને મધ્યપ્રદેશના ભૂતપૂર્વ મુખ્યમંત્રી દિગ્વિજય સિંહે રાજકારણમાંથી નિવૃત્તિની અટકળોને ફગાવી દીધી છે. દિગ્વિજય સિંહ, જે દિગ્ગી રાજા તરીકે જાણીતા છે, તેમણે કહ્યું કે તેમણે પાર્ટીને ફક્ત વિનંતી કરી છે કે તેમનો વર્તમાન કાર્યકાળ પૂરો થયા પછી રાજ્યસભામાં ત્રીજા કાર્યકાળ માટે તેમને નોમિનેટ ન કરવામાં આવે. તેમણે કહ્યું કે તેઓ તેમના છેલ્લા શ્વાસ સુધી પાર્ટીની સેવા કરતા રહેશે.
ખરેખર, દિગ્વિજય સિંહની ભાવિ યોજનાઓ વિશે અટકળો ત્યારે શરૂ થઈ જ્યારે તેમણે ૫ માર્ચે સોશિયલ મીડિયા પ્લેટફોર્મ ‘ઠ’ પર એક વીડિયો શેર કર્યો, જેમાં એક દંપતી નિવૃત્તિ પછી દેશના વિવિધ સ્થળોએ મુસાફરી કરતા જાવા મળે છે. વીડિયો શેર કરતા સિંહે લખ્યું, “મારી નિવૃત્તિ યોજનાઓ? કદાચ. કેમ નહીં? જય સિયા રામ.” આનાથી એવી અટકળો શરૂ થઈ કે તેઓ સક્રિય રાજકારણમાંથી નિવૃત્તિ લેવાનો સંકેત આપી રહ્યા હતા. સિંહે પત્રકારોને જણાવ્યું કે તેમણે ફક્ત કોંગ્રેસ નેતૃત્વને વિનંતી કરી હતી કે તેમનો વર્તમાન કાર્યકાળ પૂરો થયા પછી રાજ્યસભામાં ત્રીજા કાર્યકાળ માટે તેમને નોમિનેટ ન કરવામાં આવે.
તેમણે કહ્યું, “જુઓ, આવી ચર્ચાઓ થતી રહે છે, અને તમે જાણો છો કે તે ક્્યાંથી આવે છે. મુદ્દો એ છે કે મેં મારી પાર્ટીને કહ્યું છે કે મારા બીજા કાર્યકાળ પછી, હું ત્રીજી વખત રાજ્યસભામાં જવા માંગતો નથી.” કોંગ્રેસના નેતા સિંહે કહ્યું કે આનો અર્થ એ નથી કે તેઓ પાર્ટી માટે કામ કરવાનું બંધ કરી દેશે, પરંતુ તેઓ તેમના છેલ્લા શ્વાસ સુધી કોંગ્રેસની સેવા કરતા રહેશે. તેમણે કહ્યું કે તેમને કઈ જવાબદારી સોંપવામાં આવશે તે પાર્ટી નેતૃત્વ, ઓલ ઇન્ડિયા કોંગ્રેસ કમિટી અને મધ્યપ્રદેશ કોંગ્રેસ પર નિર્ભર રહેશે.
દિગ્વિજય સિંહે સોશિયલ મીડિયા પર શેર કરાયેલા વીડિયો અંગે પણ સ્પષ્ટતા કરી. તેમણે કહ્યું કે તે ઓડિશાના એક નિવૃત્ત બેંક મેનેજર દંપતીનો વીડિયો હતો જે દેશભરમાં પ્રવાસ કરી રહ્યા છે અને તેમને આ વિચાર રસપ્રદ લાગ્યો, તેથી તેમણે તે શેર કર્યો. જ્યારે તેમના વલણ વિશે પૂછવામાં આવ્યું કે શું કોંગ્રેસ તેમને રાજ્યસભામાં રહેવા માટે કહે છે, ત્યારે દિગ્વિજય સિંહે સીધી ટિપ્પણી કરવાનું ટાળ્યું, તેને કાલ્પનિક પરિસ્થિતિ ગણાવી. ખેડૂતો માટે પ્રદર્શનની તેમની જાહેરાત વિશે પૂછવામાં આવતા, દિગ્વિજય સિંહે કહ્યું કે તેઓ હંમેશા રાજકારણમાં સક્રિય રહ્યા છે. દિગ્વિજય સિંહ ૧૯૯૩ થી ૨૦૦૩ સુધી મધ્યપ્રદેશના મુખ્યમંત્રી રહ્યા.
