ભારતીય જનતા પાર્ટીના સાંસદ કંગના રનૌતે લોકસભામાં મહિલા અનામત બિલ પર ચર્ચામાં ભાગ લેતી વખતે વડા પ્રધાન નરેન્દ્ર મોદીની પ્રશંસા કરી. પીએમ મોદીને “સૌથી મોટા નારીવાદી” ગણાવતા, તેમણે મહિલા સશક્તિકરણ માટેની સરકારની નીતિઓની પ્રશંસા કરી. બોલિવૂડ ફિલ્મ “દિલવાલે દુલ્હનિયા લે જાયેંગે” ના એક પ્રખ્યાત સંવાદનો ઉલ્લેખ કરતા કંગના રનૌતે કહ્યું, “સરકારે દેશની દીકરીઓ અને મહિલાઓને કહ્યું છે કે, ‘બધા પાંજરા તૂટી ગયા છે, બધી દિવાલો તૂટી ગઈ છે, જાઓ અને પોતાનું જીવન જીવો.
કંગના બંધારણ (૧૩૧મો) સુધારો બિલ ૨૦૨૬ (મહિલા અનામત કાયદો), સીમાંકન બિલ ૨૦૨૬ અને કેન્દ્રશાસિત પ્રદેશ કાયદા (સુધારા) બિલ ૨૦૨૬ પર ચર્ચા દરમિયાન બોલી રહી હતી. કોંગ્રેસ પર નિશાન સાધતા, તેણીએ કહ્યું કે વિપક્ષી પાર્ટીએ તેના કાર્યકાળ દરમિયાન મહિલા અનામત જેવા મુદ્દાઓને લાંબા સમય સુધી પેન્ડીંગ રાખ્યા હતા. કંગનાએ કહ્યું કે કોંગ્રેસના નેતાઓ પ્રશ્ન કરે છે કે સરકાર આટલી ઉતાવળમાં કેમ છે, પરંતુ તેણીએ જવાબ આપ્યો, “શું આવા મહત્વપૂર્ણ મુદ્દાઓને વધુ સમય માટે પેન્ડીંગ રાખવા જાઈએ?”
હિમાચલ પ્રદેશના મંડીના સાંસદ કંગનાએ કહ્યું કે વડા પ્રધાન મોદી મહિલાઓને ન્યાય સુનિશ્ચિત કરવા માટે ઝડપથી કામ કરી રહ્યા છે અને જે ૬૦ વર્ષમાં પ્રાપ્ત ન થઈ શક્્યું, તે તેમણે ૧૦ વર્ષમાં પ્રાપ્ત કર્યું છે. તેમણે કોંગ્રેસ નેતા પ્રિયંકા ગાંધી પર પણ નિશાન સાધ્યું અને કહ્યું કે વડા પ્રધાન મોદીના કાર્યકાળમાં લોકશાહી ખતરામાં નથી. તેમણે કહ્યું કે ભારતમાં મહિલાઓ રાજકારણ સિવાય અન્ય કોઈપણ ક્ષેત્રમાં પાછળ નથી, પરંતુ રાજકારણમાં તેમની ભાગીદારી ઓછી છે. ઉદાહરણ આપતાં તેમણે કહ્યું કે હિમાચલ પ્રદેશમાં ૬૮ બેઠકોમાંથી ફક્ત એક મહિલા ધારાસભ્ય છે, જ્યારે અન્ય રાજ્યોમાં પણ ફક્ત ૮-૯ ટકા મહિલા ધારાસભ્યો છે.
કંગનાએ મહિલા અનામત બિલને એક ઐતિહાસિક પગલું ગણાવ્યું, અને કહ્યું કે તે ફક્ત વડા પ્રધાન મોદીના નેતૃત્વમાં જ શક્્ય બન્યું. કોંગ્રેસ પર કટાક્ષ કરતા તેમણે કહ્યું કે જ્યારે દેશમાં કંઈક સારું થાય છે, ત્યારે “તે ચિંતિત થઈ જાય છે.” તેમણે તૃણમૂલ કોંગ્રેસ, કોંગ્રેસ અને સમાજવાદી પાર્ટીના કેટલાક નેતાઓના ભૂતકાળના નિવેદનોનો ઉલ્લેખ કર્યો, અને કહ્યું કે તેઓ સ્પષ્ટપણે મહિલાઓ પ્રત્યેના તેમના વલણને પ્રતિબિંબિત કરે છે. કંગનાએ એમ પણ કહ્યું કે જ્યારે તેણી રાજકારણમાં આવી ત્યારે એક નેતાએ તેના પોસ્ટર પર વાંધાજનક ટિપ્પણીઓ કરી હતી.
