પશ્ચિમ બંગાળના રાજકારણમાં ભાજપ સામે સંયુક્ત વિરોધ મોરચો બનાવવાની મમતા બેનર્જીની અપીલને કોંગ્રેસ અને ડાબેરી પક્ષોએ નકારી કાઢી છે. તૃણમૂલ કોંગ્રેસના વડા મમતા બેનર્જીએ એક વીડિયો સંદેશ જારી કરીને કોંગ્રેસ, સીપીએમ અને અન્ય ડાબેરી પક્ષોને ભાજપ સામે એક થવા અપીલ કરી. ભાજપને સૌથી મોટો દુશ્મન ગણાવતા, તેમણે તમામ વિપક્ષી દળોને એક સાથે આવવા હાકલ કરી.
જાકે, વિરોધ પક્ષોએ તરત જ મમતાની પહેલને નકારી કાઢી. કોંગ્રેસના પ્રવક્તા સૌમ્ય એચ. રોયે તૃણમૂલ કોંગ્રેસ પર આકરા પ્રહારો કરતા કહ્યું કે મમતા બેનર્જી હવે ૨૦૧૩ માં કોંગ્રેસના કાર્યકરો પર હુમલાના આરોપી અલ્ટ્રા-ડાબેરી જૂથોનો ટેકો શોધી રહ્યા છે. તેમણે આરોપ લગાવ્યો કે તૃણમૂલ કોંગ્રેસે અગાઉની ચૂંટણીઓમાં કોંગ્રેસને સતત બદનામ કરી અને રાજ્યમાં ભાજપને શક્તિ મેળવવા દીધી. રોયે કહ્યું કે બંગાળમાં ભાજપને રાજકીય જમીન આપવા માટે મમતા બેનર્જી પોતે જવાબદાર છે.
આ દરમિયાન, મોહમ્મદ સલીમના નેતૃત્વ હેઠળના સીપીએમ એ પણ મમતા બેનર્જીની અપીલને સંપૂર્ણપણે નકારી કાઢી. સીપીએમના રાજ્ય સચિવ મોહમ્મદ સલીમે તૃણમૂલ કોંગ્રેસને ભ્રષ્ટ અને સાંપ્રદાયિક ગણાવતા કહ્યું કે ભાજપ સામે લડવાનો અર્થ તૃણમૂલ કોંગ્રેસ સાથે ઉભા રહેવું એવો નથી.
સીપીઆઈના રાજ્ય સચિવ સ્વપ્ન બંદોપાધ્યાયે પણ સ્પષ્ટપણે કહ્યું કે મમતા બેનર્જી જેવા સરમુખત્યાર અને અલોકતાંત્રિક નેતા સાથે હાથ મિલાવવાનો કોઈ પ્રશ્ન જ નથી.
દરમિયાન, સીપીઆઈ (એમએલ) લિબરેશનના અભિજીત મજુમદારે તૃણમૂલ કોંગ્રેસને જમણેરી અને સરમુખત્યારશાહી પક્ષ ગણાવ્યો. એસયુસીઆઈ (કમ્યુનિસ્ટ) પોલિટબ્યુરોના સભ્ય અમિતાભ ચેટર્જીએ કહ્યું કે મમતા બેનર્જી હવે આવી અપીલ કરી રહ્યા છે કારણ કે તેમને રાજકીય હારનો સામનો કરવો પડ્યો છે.
દરમિયાન, પશ્ચિમ બંગાળના નવા મુખ્યમંત્રી સુવેન્દુ અધિકારીએ પણ મમતા બેનર્જીની અપીલને નજીવી ગણાવી. તેમણે કહ્યું કે રાજ્યના રાજકારણમાં મમતા બેનર્જીનું હવે કોઈ ખાસ રાજકીય મહત્વ નથી.
