ભારતીય ટીમનો સ્ટાર ફાસ્ટ બોલર મોહમ્મદ શમી ભારતીય ટીમમાંથી બહાર છે. તે નિયમિતપણે ઘરેલુ ક્રિકેટ રમી રહ્યો છે અને હવે તેને વિજય હજારે ટ્રોફી માટે બંગાળની ટીમમાં સામેલ કરવામાં આવ્યો છે, જ્યાં તે ફાસ્ટ બોલિંગ આક્રમણનું નેતૃત્વ કરશે. અભિમન્યુ ઈશ્વરનને બંગાળનો કેપ્ટન બનાવવામાં આવ્યો છે.મોહમ્મદ શમીને અગાઉ ઈજા થઈ હતી. ત્યારથી તે પાછો ફર્યો છે અને સારું પ્રદર્શન કર્યું છે. તેણે વર્તમાન ડોમેસ્ટીક સિઝનમાં તમામ ફોર્મેટમાં ૩૬ વિકેટ લીધી છે. ભારતીય ડોમેસ્ટીક સિઝનની શરૂઆત રણજી ટ્રોફીથી થઈ હતી, જ્યાં શમીએ ચાર મેચમાં ૧૮.૬૦ ની સરેરાશથી ૨૦ વિકેટ લીધી હતી. તેણે સૈયદ મુશ્તાક અલી ટ્રોફી ટી ૨૦ ટુર્નામેન્ટમાં પોતાનું પ્રભાવશાળી ફોર્મ ચાલુ રાખ્યું હતું, તેણે સાત મેચમાં ૧૪.૯૩ ની સરેરાશથી ૧૬ વિકેટ લીધી હતી.વિજય હજારે ટ્રોફીમાં મોહમ્મદ શમી બંગાળના ઝડપી બોલિંગ આક્રમણનું નેતૃત્વ કરશે. બંગાળની ટીમમાં ભારતીય ફાસ્ટ બોલર આકાશ દીપ અને મુકેશ કુમાર પણ શામેલ છે. અભિષેક પોરેલ અને સુમિત નાગને પણ વિકેટકીપર તરીકે તક આપવામાં આવી છે. શાહબાઝ અહેમદને પણ ટીમમાં શામેલ કરવામાં આવ્યા છે.બંગાળને એલીટ ગ્રુપ બીમાં રાખવામાં આવ્યું છે અને તે ૨૪ ડિસેમ્બરે રાજકોટમાં વિદર્ભ સામે તેનું અભિયાન શરૂ કરશે. આ ગ્રુપમાં અન્ય ટીમો આસામ, બરોડા, જમ્મુ અને કાશ્મીર, હૈદરાબાદ, ચંદીગઢ અને ઉત્તર પ્રદેશ છે.બંગાળની ટીમઃ અભિમન્યુ ઇશ્વરન (કેપ્ટન), અનુસ્તુપ મજુમદાર, અભિષેક પોરેલ (વિકેટકીપર), સુદીપ ઘરામી, સુમંત ગુપ્તા, સુમિત નાગ (વિકેટકીપર), ચંદ્રહાસ દશ, શાહબાઝ અહેમદ, કરણ લાલ, મોહમ્મદ શમી, આકાશ દીપ, મુકેશ કુમાર, સયાન ઘોષ, રવિ કુમાર, રવિ કુમાર, વિરાટ કુમાર, વિશ્રામ કુમાર મિશ્રા.
