લાઠી શહેરમાં અસામાજિક તત્વોનો ત્રાસ વધી રહ્યો હોય તેમ વધુ એક હિંસક ઘટના સામે આવી છે. અહીં એક યુવકને અજાણ્યા શખ્સે કારણ વગર ગાળો આપી છરી વડે હુમલો કરી ઈજા પહોંચાડતા પોલીસ ફરિયાદ નોંધાઈ હતી. રવિભાઈ વિનુભાઈ ડાભી (ઉ.વ.૧૯)એ અજાણ્યા ઈસમ સામે નોંધાવેલી ફરિયાદ પ્રમાણે, મળતી માહિતી મુજબ, લાઠીમાં રહેતા ફરિયાદી યુવકને કોઈ અજાણ્યા શખ્સે રસ્તામાં આંતરીને અચાનક ગાળો આપવાનું શરૂ કર્યું હતું. તેઓ કંઈ સમજે તે પહેલાં જ ઉશ્કેરાયેલા હુમલાખોરે પોતાની પાસે રહેલી છરી વડે ફરિયાદી પર હુમલો કરી દીધો હતો. હુમલાખોરે તેમને વાંસાના ભાગે છરી મારતા ત્યાં બે જગ્યાએ ઉજરડા જેવી ઈજાઓ પહોંચી હતી. હુમલો કર્યા બાદ અજાણ્યો શખ્સ ત્યાંથી નાસી છૂટ્યો હતો. જાહેરમાં થયેલા આ હુમલાને કારણે સ્થાનિકોમાં ભયનો માહોલ જોવા મળ્યો હતો.
