દેશ હાલમાં તીવ્ર ગરમીના મોજાની ઝપેટમાં છે, ઘણા શહેરોમાં તાપમાન ૪૫ ડિગ્રી સેલ્સિયસને વટાવી ગયું છે. ભારતીય હવામાન વિભાગ અને તાજેતરના હીટ ઇન્ડેક્સ ડેટા અનુસાર, ઉત્તર અને મધ્ય ભારતના ઘણા શહેરોમાં રેકોર્ડબ્રેક ગરમી નોંધાઈ છે. ઉત્તર પ્રદેશનું બાંદા દેશનું સૌથી ગરમ શહેર હતું, જ્યાં તાપમાન ૪૮.૨ ડિગ્રી સેલ્સિયસ સુધી પહોંચ્યું હતું.
દેશના ટોચના ૧૦ સૌથી ગરમ શહેરો જાઇએ તો બાંદા ઉત્તર પ્રદેશ ૪૮.૨ સે,ખજુરાહો મધ્ય પ્રદેશ ૪૭.૪° સે, શ્રીગંગાનગર રાજસ્થાન ૪૬.૫° સે,ચંદીગઢ ૪૬.૦° સે,ઝાંસી ઉત્તર પ્રદેશ ૪૬.૦° સે,જમ્મુ જમ્મુ અને કાશ્મીર ૪૬.૦ સે,આગ્રા ઉત્તર પ્રદેશ ૪૫.૦° સે,ગ્વાલિયર મધ્ય પ્રદેશ ૪૫.૦° સે કોટા રાજસ્થાન ૪૫.૦° સે નવી દિલ્હી દિલ્હી ૪૪-૪૫° સે નોંધાયું છે
હવામાન વિભાગે ઉત્તર ભારતથી મધ્ય અને પૂર્વ ભારત સુધીના ઘણા રાજ્યોમાં ગરમીના મોજા, તીવ્ર ગરમીના મોજા, ગરમ અને ભેજવાળા હવામાન અને ગરમ રાત અંગે ચેતવણી જારી કરી છે. દક્ષિણપશ્ચિમ ચોમાસાની પ્રગતિ અંગે પણ એક મુખ્ય અપડેટ આપવામાં આવ્યું છે. હવામાન વિભાગના જણાવ્યા અનુસાર, ૨૩ થી ૨૭ મે દરમિયાન હરિયાણા, ચંદીગઢ અને દિલ્હીના ઘણા વિસ્તારોમાં ગરમીથી લઈને તીવ્ર ગરમીના મોજાની સ્થિતિ રહેવાની શક્યતા છે. આ સમયગાળા દરમિયાન પંજાબમાં પણ ગરમીના મોજાની સ્થિતિ રહેવાની શક્યતા છે. ૨૩ થી ૨૭ મે દરમિયાન પૂર્વી ઉત્તર પ્રદેશના કેટલાક વિસ્તારોમાં તીવ્ર ગરમીનું મોજું આવવાની સંભાવના છે, જ્યારે ૨૨ થી ૨૭ મે દરમિયાન પશ્ચિમ ઉત્તર પ્રદેશમાં પણ ગરમીનું મોજું આવવાની સંભાવના છે.૨૫ થી ૨૭ મે દરમિયાન પશ્ચિમ રાજસ્થાન માટે તીવ્ર ગરમીનું મોજું આવવાની ચેતવણી અને ૨૨ થી ૨૪ મે દરમિયાન મધ્યમ ગરમીનું મોજું આવવાની ચેતવણી જારી કરવામાં આવી છે.૨૩ થી ૨૭ મે દરમિયાન પૂર્વી રાજસ્થાનમાં ગરમીનું મોજું આવવાની સંભાવના છે.૨૩ થી ૨૫ મે દરમિયાન મધ્ય પ્રદેશ, વિદર્ભ, દરિયાકાંઠાના આંધ્ર પ્રદેશ અને યાનમના પૂર્વી ભાગોમાં તીવ્ર ગરમીનું મોજું આવવાની સંભાવના છે. ૨૬ અને ૨૭ મેના રોજ પૂર્વી મધ્ય પ્રદેશમાં પણ ગરમીનું મોજું આવવાની સંભાવના છે.૨૩ થી ૨૪ મે દરમિયાન બિહાર અને તેલંગાણામાં, ૨૩ થી ૨૫ મે દરમિયાન ઝારખંડમાં અને ૨૩ થી ૨૫ મે દરમિયાન ઓડિશામાં ગરમીનું મોજું આવવાની ચેતવણી જારી કરવામાં આવી છે. ૨૩ મેના રોજ હિમાચલ પ્રદેશ અને ઉત્તરાખંડના કેટલાક ભાગોમાં ગરમીના મોજાની પણ આગાહી છે.
હવામાન વિભાગે અનેક રાજ્યોમાં ગરમ રાત્રિઓ માટે ચેતવણી પણ જારી કરી છે. ૨૩ થી ૨૫ મે દરમિયાન ઓડિશામાં, ૨૩ અને ૨૫ મેના રોજ ઉત્તર પ્રદેશ અને વિદર્ભમાં, ૨૨ મેના રોજ બિહારમાં અને ૨૩ મેના રોજ હરિયાણા, ચંદીગઢ અને દિલ્હીમાં રાત્રિનું તાપમાન સામાન્ય કરતાં વધુ રહેવાની ધારણા છે. વધુમાં, ૨૩ થી ૨૬ મે દરમિયાન ગંગા પશ્ચિમ બંગાળમાં ગરમ અને ભેજવાળી હવામાનની આગાહી છે. ૨૩ થી ૨૭ મે દરમિયાન ઓડિશામાં અને ૨૩ થી ૨૭ મે દરમિયાન તમિલનાડુ, પુડુચેરી અને કરાઈકલમાં ભેજવાળી હવામાનની આગાહી છે.
તમિલનાડુના ૧૫ થી વધુ જિલ્લાઓમાં તાપમાન ૩૯ ડિગ્રી સેલ્સિયસને વટાવી ગયું છે. બુધવારે ચેન્નાઈમાં આ ઉનાળામાં ૪૨ ડિગ્રી સેલ્સિયસનું સૌથી વધુ તાપમાન નોંધાયું છે. પ્રાદેશિક હવામાન કેન્દ્રે તમિલનાડુના દરિયાકાંઠાના અને પુડુચેરીમાં ગરમીના મોજા જેવી સ્થિતિની ચેતવણી આપી છે. ૨૩ મેથી તિરુવન્નામલાઈ, તિરુચિરાપલ્લી, સેલમ, નમક્કલ, વેલ્લોર, તિરુપત્તુર અને ધર્મપુરી જિલ્લામાં વાવાઝોડા, ભારે પવન અને ભારે વરસાદની આગાહી છે. પુડુક્કોટાઈ જિલ્લાના અરંથાંગીમાં છેલ્લા ૨૪ કલાકમાં સૌથી વધુ ૫ સેન્ટિમીટર વરસાદ નોંધાયો છે.
હવામાન વિભાગે દક્ષિણપશ્ચિમ ચોમાસા વિશે પણ માહિતી આપી છે. હવામાન વિભાગે જણાવ્યું છે કે આગામી ત્રણથી ચાર દિવસમાં દક્ષિણ-પશ્ચિમ ચોમાસુ દક્ષિણ-પૂર્વ અરબી સમુદ્ર, કોમોરિન પ્રદેશ, દક્ષિણ-પશ્ચિમ અને દક્ષિણપૂર્વ બંગાળની ખાડી, આંદામાન સમુદ્રના બાકીના ભાગો અને પૂર્વ-મધ્ય બંગાળની ખાડીના કેટલાક વધુ વિસ્તારોમાં આગળ વધવા માટે પરિસ્થિતિઓ અનુકૂળ રહેશે.
દરમિયાન લદ્દાખમાં ઝોજિલા પાસની આસપાસના ઊંચા પર્વતો પર બરફની ચાદર છવાઈ ગઈ. આ કમોસમી હિમવર્ષાને કારણે શ્રીનગર-લદ્દાખ રાષ્ટ્રીય ધોરીમાર્ગને કામચલાઉ બંધ કરવાની ફરજ પડી. હવામાનમાં આ અચાનક ફેરફારને કારણે આ વ્યૂહાત્મક રીતે મહત્વપૂર્ણ માર્ગ પર ટ્રાફિક પર અસર પડી છે. હિમવર્ષાની સાથે, કાશ્મીર ખીણમાં તાપમાનમાં પણ તીવ્ર ઘટાડો થયો છે. ખીણના મેદાની વિસ્તારોમાં સતત વરસાદ અને વાવાઝોડા ચાલુ છે. હવામાન વિભાગના જણાવ્યા અનુસાર, આગામી ત્રણ દિવસ સુધી પ્રતિકૂળ હવામાન ચાલુ રહેવાની ધારણા છે.
