સુરતના ઔદ્યોગિક વિસ્તાર સચિન જીઆઇડીસી પોલીસ સ્ટેશનની ટીમે ગુમ થયેલા બાળકો અને વ્યક્તિઓને શોધવા માટે અનોખી કામગીરી કરી હોવાનો દાવો કર્યો છે. પોલીસ સ્ટેશનના ઉપલબ્ધ આંકડા મુજબ, વર્ષ ૨૦૨૫થી ઓક્ટોબર ૨૦૨૬ સુધીમાં કુલ ૨૬૧ ગુમ થયેલા લોકો મળી આવ્યા છે. તેમાં ૨૩૩ બાળકો અને ૨૮ પુખ્ત વયના લોકોનો સમાવેશ થાય છે. પોલીસની ટીમે ટેકનિકલ સર્વેલન્સની સાથે સ્થાનિક લોકોનું નેટવર્ક ઊભું કરીને આ કામગીરી કરી હોવાનું જણાવાયું છે.
૩૧ ડિસેમ્બર ૨૦૨૫ સુધીના એક વર્ષમાં સચિન જીઆઇડીસી પોલીસને ૬૮ ગુમ થયેલા લોકો શોધવામાં સફળતા મળી હતી. તેમાં ૦થી ૫ વર્ષનાં ૩૩, ૬થી ૧૦ વર્ષનાં ૧૨, ૧૧થી ૧૫ વર્ષનાં ૧૩ અને ૧૬થી ૧૮ વર્ષનાં ૯ બાળકોનો સમાવેશ થાય છે. આ ઉપરાંત ૧૮ વર્ષથી વધુ ઉંમરની એક મહિલાને પણ શોધી કાઢવામાં આવી હતી. ત્યારબાદ ઓક્ટોબર ૨૦૨૬ સુધીના સાત મહિનામાં વધુ ૧૯૩ લોકોને શોધવામાં આવ્યા હતા. તેમાં ૧૮ વર્ષથી ઓછી ઉંમરનાં ૧૬૬ બાળકો અને ૧૮ વર્ષથી વધુ ઉંમરના ૨૭ પુરુષ-મહિલાઓનો સમાવેશ થાય છે. આ બંને સમયગાળાના આંકડા જોડતાં કુલ ૨૩૩ બાળકો અને ૨૮ પુખ્ત વયના લોકો મળીને ૨૬૧ વ્યક્તિઓ થાય છે.
પોલીસે ગુમ થયેલા બાળકોને શોધવા માટે વિસ્તારના શાકભાજીની લારીવાળા, વેપારીઓ, દુકાનદારો, રિક્ષાચાલકો અને આસપાસનાં ગામોના આગેવાનો સાથે સંપર્ક વધાર્યો હોવાનું જણાવાયું છે. આ માટે અલગ-અલગ વોટ્સએપ ગ્રુપ બનાવવામાં આવ્યાં હતાં. બાળક ગુમ થયાની જાણ થતાં જ તેનો ફોટો આ ગ્રુપમાં મોકલીને સ્થાનિક લોકોની મદદ લેવામાં આવતી હતી.
આ ઉપરાંત બાળકના વતન તરફ જતી ટ્રેનોના રેલવે અધિકારીઓ સાથે પણ સંકલન સાધવામાં આવતું હતું. પોલીસના જણાવ્યા મુજબ, ટેકનિકલ ટીમ, સીસીટીવી ફૂટેજ અને સ્થાનિક લોકો પાસેથી મળતી માહિતીના આધારે બાળકોને શોધવાની કામગીરી કરવામાં આવે છે. પોલીસ ઇન્સ્પેક્ટર કુલદીપસિંહ ગોહિલના જણાવ્યા મુજબ, તપાસ દરમિયાન કેટલાક કિસ્સાઓમાં બાળકો માતા-પિતાના સામાન્ય ઠપકાથી નારાજ થઈને ઘરેથી નીકળી જતા હોવાનું સામે આવ્યું છે. કેટલાક બાળકો રમતાં-રમતાં રસ્તો ભૂલી જાય છે, જ્યારે અન્ય બાળકો વતનથી નવા આવેલા હોવાથી દાદા-દાદી કે નાના-નાનીની યાદમાં ઘર છોડી દેતા હોય છે.
સચિન જીઆઇડીસી વિસ્તારમાં પરપ્રાંતીય શ્રમિક પરિવારોની મોટી વસ્તી છે. ઘણા પરિવારોમાં માતા-પિતા બંને નોકરી કે કારખાનામાં કામ કરવા જતા હોવાથી બાળકો ઘરે એકલા રહેતા હોય છે. આવા સંજાગોમાં બાળક ગુમ થાય ત્યારે તેની શોધ માટે પોલીસ સ્થાનિક લોકો અને ટેકનિકલ માધ્યમોની મદદ લે છે. પોલીસ દ્વારા આપવામાં આવેલી વિગતો મુજબ, વૈષ્ણવી નામની ૧૧થી ૧૨ વર્ષની બાળકીને શોધવા માટે સચિન જીઆઇડીસી પોલીસ અને ક્રાઇમ બ્રાન્ચની ૧૬ ટીમોએ તપાસ કરી હતી. આ દરમિયાન ૩૦૦થી વધુ સીસીટીવી ફૂટેજ તપાસવામાં આવ્યા હતા અને દોઢ વર્ષ બાદ બાળકીને સુરક્ષિત શોધી કાઢવામાં આવી હતી. ગુમ થયેલા બાળકો અને વ્યક્તિઓને શોધવાની આ કામગીરીમાં પોલીસ સ્થાનિક લોકો, ટેકનિકલ સર્વેલન્સ અને અન્ય વિભાગો સાથે સંકલન સાધી રહી છે. આંકડાઓ મુજબ, સચિન જીઆઇડીસી પોલીસ સ્ટેશનની હદમાંથી મળેલા કુલ ૨૬૧ લોકોમાં ૨૩૩ બાળકોનો સમાવેશ થાય છે.
