સાવરકુંડલા તાલુકાના ગાધકડા ગામમાં ભારતીય જનતા પાર્ટી દ્વારા સ્થાનિક સ્વરાજ્યની ચૂંટણીના માહોલ વચ્ચે ભવ્ય લોકસંપર્ક અભિયાનનું આયોજન કરવામાં આવ્યું હતું. આ કાર્યક્રમમાં પ્રાદેશિક ધારાસભ્ય મહેશભાઈ કસવાળા અને ભાજપના પદાધિકારીઓએ ગ્રામજનો સાથે સીધો સંવાદ સાધ્યો હતો. ધારાસભ્યએ ઉપસ્થિત જનમેદનીને સંબોધતા જણાવ્યું હતું કે ભાજપ સરકાર હંમેશા વિકાસ, પારદર્શિતા અને જનસેવાના મંત્ર સાથે આગળ વધી રહી છે. તેમણે ગામના વિકાસકાર્યોને વધુ ગતિશીલ બનાવવા માટે આગામી ચૂંટણીમાં ભાજપને પ્રચંડ બહુમતી સાથે વિજયી બનાવવા ભાવભરી અપીલ કરી હતી. આ અભિયાન દરમિયાન ગામના યુવાનો, વડીલો અને મહિલાઓમાં ભારે ઉત્સાહ અને ભાજપ પ્રત્યે મક્કમ વિશ્વાસ જોવા મળ્યો હતો.
