અમેરિકન દૂતાવાસ તરફ કૂચ કરી, ૧૨ લોકોના મોત
ઇઝરાયલી હુમલામાં ઈરાનના સુપ્રીમ લીડર આયાતુલ્લાહ અલી ખામેનીના મૃત્યુ બાદ પાકિસ્તાનમાં પરિસ્થિતિ વધુ વણસી છે. કરાચીમાં વાણિજ્ય દૂતાવાસમાં આગચંપી બાદ, ૫,૦૦૦ થી વધુ વિરોધીઓનું અનિયંત્રિત ટોળું હવે ઇસ્લામાબાદમાં અમેરિકન દૂતાવાસ તરફ આગળ વધી રહ્યું છે. લખતી વખતે, આ ભીડ ઇસ્લામાબાદના ડિપ્લોમેટિક એન્ક્લેવથી માત્ર ૨ કિમી દૂર હતી. રેડ ઝોનની અંદર એમ્બેસી રોડ પર પોલીસ સાથે ભીષણ અથડામણ ચાલી રહી છે. પોલીસે પ્રદર્શનકારીઓ પર ગોળીબાર કર્યો છે, જેના પરિણામે અનેક લોકોના મોત થયા છે. કરાચીમાં બાર લોકો માર્યા ગયા છે. લાહોરમાં પણ હિંસા ફાટી નીકળી છે. પ્રદર્શનકારીઓમાં મોટી સંખ્યામાં મહિલાઓ અને બાળકોનો સમાવેશ થાય છે. એવું લાગે છે કે જા પોલીસ બેકાબૂ ભીડને કાબુમાં લેવામાં નિષ્ફળ જશે, તો યુએસ એમ્બેસી પર હુમલો કરવામાં આવશે.
બંધારણની કલમ ૨૪૫ હેઠળ પાકિસ્તાન સેનાને સ્કાર્ડુમાં તૈનાત કરવામાં આવી છે, જ્યાં પરિસ્થિતિ નિયંત્રણ બહાર થઈ ગઈ છે. ગિલગિટ-બાલ્તિસ્તાન પોલીસના જણાવ્યા અનુસાર, આ તૈનાતીનો હેતુ પ્રદેશમાં કાયદો અને વ્યવસ્થાની વધતી ચિંતાઓ વચ્ચે નાગરિક અધિકારીઓને લશ્કરી સહાય પૂરી પાડવાનો છે. કરાચી વહીવટીતંત્રે હિંસક વિરોધ પ્રદર્શનમાં નવ લોકોના મોતની વાત સ્વીકારી છે. પ્રદર્શનકારીઓએ કરાચીમાં યુનાઇટેડ સ્ટેટ્સ કોન્સ્યુલેટ પર હુમલો કર્યો અને પોલીસ સાથે અથડામણ કરી.
ઇસ્લામાબાદ પરિસ્થિતિઃ યુએસ એમ્બેસીએ સોશિયલ મીડિયા પ્લેટફોર્મ એકસ પર એક નિવેદન જારી કર્યું. તેમાં કહેવામાં આવ્યું છે કે, “અમે કરાચી અને લાહોરમાં યુએસ કોન્સ્યુલેટ જનરલ ખાતે ચાલી રહેલા વિરોધ પ્રદર્શનોના અહેવાલો પર નજર રાખી રહ્યા છીએ. અમે યુએસ એમ્બેસી ઇસ્લામાબાદ અને કોન્સ્યુલેટ જનરલ પેશાવર ખાતે વધુ વિરોધ પ્રદર્શનો માટે પણ વિનંતીઓ પર નજર રાખી રહ્યા છીએ. અમે પાકિસ્તાનમાં યુએસ નાગરિકોને સ્થાનિક સમાચારોનું નિરીક્ષણ કરવા અને સુરક્ષિત રહેવાની સલાહ આપીએ છીએ. તમારી આસપાસના વાતાવરણથી વાકેફ રહો અને ભીડવાળા વિસ્તારોથી દૂર રહો.”
એક પ્રદર્શનકારીએ કહ્યું, “અમે કરાચીમાં યુએસ કોન્સ્યુલેટમાં આગ લગાવી રહ્યા છીએ. ભગવાનની ઇચ્છા હોય, અમે અમારા નેતાની હત્યાનો બદલો લઈ રહ્યા છીએ.” લાહોર અને સ્કાર્દુમાં પણ હજારો લોકો રસ્તાઓ પર ઉતરી રહ્યા છે, અને સાંજે ઇસ્લામાબાદમાં યુએસ એમ્બેસી સ્થિત રાજદ્વારી એન્ક્લેવ નજીક પ્રદર્શનો થવાની અપેક્ષા છે. ઈરાની રાજ્ય મીડિયાએ યુએસ અને ઇઝરાયલી લશ્કરી હુમલાઓ બાદ સુપ્રીમ લીડર આયતુલ્લાહ અલી ખામેનીના મૃત્યુની પુષ્ટિ કર્યા પછી વિરોધ પ્રદર્શનો શરૂ થયા હતા. અમેરિકાના રાષ્ટ્રપતિ ડોનાલ્ડ ટ્રમ્પે સંકેત આપ્યો હતો કે આ હુમલાઓનો હેતુ ઈરાનના નેતૃત્વને ખતમ કરવાનો હતો અને ચેતવણી આપી હતી કે વધુ હુમલા ચાલુ રહી શકે છે.
