મદ્રાસ હાઈકોર્ટે તમિલનાડુ વેત્રી કઝગમ (ટીવીકે) ધારાસભ્ય આર. શ્રીનિવાસ સેતુપતિને ફટકો આપ્યો છે, જેમણે તમિલનાડુ વિધાનસભાની ચૂંટણી એક મતથી જીતી હતી. કોર્ટે તિરુપત્તુરના ધારાસભ્ય સેતુપતિને મંગળવાર (૧૨ મે) ના રોજ યોજાનારી વિધાનસભાની કાર્યવાહીમાં ભાગ લેવાથી પ્રતિબંધિત કર્યા છે. કોર્ટે આ આદેશ તેમના વિરોધી અને દ્રવિડ મુનેત્ર કઝગમ ઉમેદવાર કે.આર. પેરિયાકરુપ્પન દ્વારા તિરુપત્તુર મતવિસ્તારમાં દાખલ કરાયેલી અરજી પર આપ્યો હતો.
હકીકતમાં, તિરુપત્તુર વિધાનસભા બેઠક પરથી ચૂંટણી લડનારા શ્રીનિવાસ સેતુપતિ ખૂબ જ નજીકની હરીફાઈમાં માત્ર એક મતથી જીત્યા હતા. તેમને કુલ ૮૩,૩૬૫ મત મળ્યા હતા, જ્યારે તેમના હરીફ, ડીએમકે ઉમેદવાર કે.આર. પેરિયાકરુપ્પનને ૮૩,૩૬૪ મત મળ્યા હતા. આ ખૂબ જ નાના તફાવતે ચૂંટણી પરિણામો પર વિવાદ ઉભો કર્યો હતો.
હારેલા ડ્ઢસ્દ્ભ નેતા કે.આર. પેરિયાકરુપ્પને ચૂંટણી પરિણામોને પડકાર્યા હતા. કોર્ટમાં દાખલ કરેલી અરજીમાં તેમણે આરોપ લગાવ્યો હતો કે પોસ્ટલ બેલેટ સાથે છેડછાડ કરવામાં આવી હતી, જેના પરિણામે ટીવીકે ઉમેદવારનો વિજય થયો હતો. તેમનો દાવો છે કે તિરુપત્તુર વિધાનસભા મતવિસ્તાર નંબર ૧૮૫ માટે પડેલા મતને વેલ્લોર જિલ્લાના તિરુપત્તુર વિધાનસભા મતવિસ્તાર નંબર ૫૦ માં ખોટી રીતે ઉમેરવામાં આવ્યો હતો. તેમણે એમ પણ કહ્યું કે આ બાબતે ચૂંટણી પંચમાં ફરિયાદ દાખલ કરવામાં આવી હતી, પરંતુ કોઈ સંતોષકારક જવાબ મળ્યો ન હતો, જેના પગલે તેમણે કોર્ટનો સંપર્ક કર્યો હતો.
આ દરમિયાન, ન્યાયાધીશ વિક્ટોરિયા ગૌરી અને સેન્થીલકુમારની બેન્ચે ઠરાવ્યું કે પ્રથમ દ્રષ્ટિએ કેસ અસ્તિત્વમાં છે અને સેતુપતિને આગામી આદેશો સુધી ગૃહની કાર્યવાહીમાં ભાગ લેવાથી પ્રતિબંધિત કર્યા છે. હાઈકોર્ટે તેના આદેશમાં સ્પષ્ટપણે જણાવ્યું હતું કે શ્રીનિવાસ સેતુપતિ હાલ માટે વિધાનસભાની કોઈપણ કાર્યવાહીમાં ભાગ લઈ શકશે નહીં.
ચૂંટણી પંચે આ મુદ્દા પર જણાવ્યું હતું કે ચૂંટણી પરિણામો જાહેર થયા પછી જ ચૂંટણી અરજીઓ હાઈકોર્ટ અને સુપ્રીમ કોર્ટમાં દાખલ કરી શકાય છે. કમિશને એમ પણ જણાવ્યું હતું કે એક પણ પોસ્ટલ બેલેટ બીજા મતવિસ્તારમાં ટ્રાન્સફર કરવામાં આવ્યો ન હતો. જાકે, કોર્ટે શોધી કાઢ્યું હતું કે પેરિયાકરુપ્પન દ્વારા દાખલ કરવામાં આવેલી ફરિયાદને સમર્થન આપવા માટે પૂરતા પુરાવા છે. પરિણામે, કોર્ટે શ્રીનિવાસ સેતુપતિને ધારાસભ્ય તરીકે વિધાનસભા વિશ્વાસ મતમાં ભાગ લેવાથી પ્રતિબંધિત કર્યા હતા.
હાઇકોર્ટે કમિશનને સોગંદનામું દાખલ કરવા અને આ મુદ્દા પર જવાબ આપવા જણાવ્યું છે. કોર્ટે એવો પણ નિર્દેશ આપ્યો છે કે તિરુપટ્ટુર વિધાનસભા મતવિસ્તાર નંબર ૧૮૫ ના કોઈપણ પોસ્ટલ બેલેટ, જે તિરુપટ્ટુર વિધાનસભા મતવિસ્તાર નંબર ૫૦ માં પ્રાપ્ત થયા છે, તેને સીલબંધ, સુરક્ષિત અને સાચવવામાં આવે. કોર્ટે મત ગણતરી, પોસ્ટલ બેલેટની ચકાસણી, પોસ્ટલ બેલેટને અસ્વીકાર અને બેકઅપ નકલો સાથે તેના મૂળ ઇલેક્ટ્રોનિક સ્વરૂપમાં ફરીથી ચકાસણી સંબંધિત વિડિઓ ફૂટેજ સાચવવાનો આદેશ આપ્યો છે.
