મહારાષ્ટ્રના નાયબ મુખ્યમંત્રી અને એનસીપી વડા અજિત પવારનું તાજેતરમાં વિમાન દુર્ઘટનામાં અવસાન થયું. તેમના મૃત્યુ પર આખું રાજ્ય શોકમાં ડૂબી ગયું હતું. અજિત પવારના અંતિમ સંસ્કારમાં મોટી ભીડ હાજર રહી હતી. જાકે, ચેઈન સ્નેચરોએ આ તકનો લાભ ઉઠાવ્યો અને ૧૫ લોકોના ઘરેણાં ચોરી લીધા. અંતિમ સંસ્કાર દરમિયાન સોનાની ચેઈન ચોરીની આઘાતજનક ઘટનાએ બધાને ચોંકાવી દીધા છે.
૨૮ જાન્યુઆરીના રોજ, રાજ્યના નાયબ મુખ્યમંત્રી અજિત પવારનું વિમાન દુર્ઘટનામાં દુઃખદ અવસાન થયું. તેમના પાર્થિવ દેહનો બારામતીના વિદ્યા પ્રતિષ્ઠાન મેદાનમાં સંપૂર્ણ રાજ્ય સન્માન સાથે અંતિમ સંસ્કાર કરવામાં આવ્યો. અંતિમ સંસ્કાર માટે મહારાષ્ટ્રભરમાંથી લાખો લોકો બારામતી ઉમટી પડ્યા હતા અને આખું શહેર શોકમાં ડૂબી ગયું હતું. આ ભીડનો લાભ લઈને, ચોરોની એક ટોળકીએ લોકોને નિશાન બનાવ્યા હતા.
અહેવાલો અનુસાર, આશરે ૧૫ લોકોના ગળામાંથી સોનાની ચેઈન ચોરી થઈ હતી. ચોરાયેલા દાગીનાની કિંમત ૨૫ થી ૩૦ લાખ હોવાનો અંદાજ છે. દરમિયાન, કેટલાક શંકાસ્પદ ચોરોને નાગરિકો દ્વારા રંગે હાથે પકડવામાં આવ્યા હતા, જ્યારે અન્યને પોલીસને સોંપવામાં આવ્યા હતા. નોંધનીય છે કે, તે દિવસે બારામતીમાં આશરે ૮,૦૦૦ પોલીસ કર્મચારીઓ તૈનાત હતા. આમ છતાં, આટલી મોટી ચોરીની ઘટનાએ પોલીસ તંત્ર પર પ્રશ્નો ઉભા કર્યા છે.
અસરગ્રસ્ત નાગરિકોની ફરિયાદના આધારે બારામતી તાલુકા પોલીસ સ્ટેશનમાં કેસ નોંધવામાં આવ્યો છે. પોલીસે મોહમ્મદ યુનુસ, રાજકુમાર આઠવલે, એજાઝ મીરાવાલે, મોહમ્મદ સિરાજ, બાલુ બોત્રે અને અન્ય બે આરોપીઓ સામે કેસ દાખલ કર્યો છે. હાલમાં તમામ આરોપીઓની સઘન પૂછપરછ કરવામાં આવી રહી છે. અજિત પવારના અંતિમ સંસ્કાર દરમિયાન વાતાવરણ અત્યંત ભાવનાત્મક હતું, ત્યારે ચોરો લોકોના ગળામાંથી સોનાની ચેઈન ચોરી કરવામાં વ્યસ્ત હતા. આ ઘટનાથી બારામતી શહેરમાં વ્યાપક રોષ ફેલાયો છે.
