મહારાષ્ટ્રમાં ફરી એકવાર વરસાદ સમસ્યા બની ગયો છે. રવિવાર મોડી રાતથી રાજ્યના ઘણા ભાગોમાં ભારે વરસાદ પડી રહ્યો છે. દરમિયાન, મુંબઈમાં ભારે વરસાદને કારણે શહેરના ઘણા ભાગોમાં ભારે પાણી ભરાઈ ગયા. સવારે કિંગ્સ સર્કલ વિસ્તારમાં રસ્તાઓ નાળા જેવા દેખાતા હતા. તે જ સમયે, મુંબઈના વડાલા વિસ્તારમાં એક મોનોરેલ ટેકનિકલ ખામીને કારણે બંધ થઈ ગઈ. સ્સ્ઇડ્ઢછ ના જનસંપર્ક અધિકારીએ જણાવ્યું હતું કે, ‘વડાલા ખાતે મોનોરેલમાં ટેકનિકલ ખામી સર્જાયા બાદ ૧૭ મુસાફરોને સુરક્ષિત રીતે બહાર કાઢવામાં આવ્યા છે. સવારે ૭ઃ૪૫ વાગ્યે મુસાફરોને સુરક્ષિત રીતે બહાર કાઢવામાં આવ્યા હતા.
ફાયર વિભાગના એક અધિકારીએ જણાવ્યું હતું કે, ‘આજે સવારે ૭ વાગ્યે મુકુંદરાવ આંબેડકર રોડ જંકશન પર મોનોરેલમાં ટેકનિકલ ખામી સર્જાઈ હતી. મોનોરેલ ગાડગે મહારાજ સ્ટેશનથી ચેમ્બુર જઈ રહી હતી. મોનોરેલની ટેકનિકલ ટીમે મુંબઈ ફાયર વિભાગને ફોન કર્યો હતો. અમારું ખાસ વાહન તાત્કાલિક ઘટનાસ્થળે પહોંચી ગયું હતું. મોનોરેલની ટેકનિકલ ટીમે ટ્રેનમાં સવાર ૧૭ લોકોને સુરક્ષિત રીતે બહાર કાઢ્યા હતા. કપલિંગ દ્વારા ટ્રેનને વડાલા લઈ જવામાં આવી રહી છે. કોઈ ઈજાના અહેવાલ નથી. બધા સુરક્ષિત છે. કામગીરી પૂર્ણ થઈ ગઈ છે.’
રિપબ્લીકન પાર્ટી ઓફ ઇન્ડિયા (અઠાવલે) વોર્ડ ૧૭૫ ના કાઉન્સીલર રાજેશ આનંદ ભોજણેએ જણાવ્યું હતું કે વડાલા જતી ટ્રેન બંધ થઈ ગઈ છે. મુસાફરોને ચેમ્બુરથી આવતી ટ્રેનમાં ખસેડવામાં આવ્યા હતા. બાદમાં ફાયર બ્રિગેડ આવીને તેમનું કામ શરૂ કર્યું. મોનોરેલના અધિકારીઓ કહી રહ્યા છે કે તે સપ્લાય સમસ્યા હતી. હું સરકારને આ વારંવાર થતી સમસ્યાનો ઉકેલ લાવવા વિનંતી કરું છું. સોમવારે સવારે મુંબઈવાસીઓ વરસાદથી જાગી ગયા. શહેર અને ઉપનગરોના નીચાણવાળા વિસ્તારોમાં પાણી ભરાઈ જવાથી ઓફિસ પીક અવર્સ દરમિયાન ટ્રાફિક ધીમો પડી ગયો. રાતોરાત અને સવારે ભારે વરસાદ બાદ, સેન્ટ્રલ રેલ્વે રૂટ પર કુર્લા સ્ટેશન અને પશ્ચિમ રેલ્વે નેટવર્ક પર બાંદ્રા સ્ટેશન પર પાટા પર પાણી ભરાઈ ગયા. લોકલ ટ્રેનો થોડી મોડી દોડી રહી છે.
મ્યુનિસિપલ અધિકારીઓના જણાવ્યા અનુસાર, મધ્યરાત્રિની આસપાસ શરૂ થયેલો ભારે વરસાદ વીજળી અને ગાજવીજ સાથે સવારે પણ ચાલુ રહ્યો, જેના કારણે કિંગ્સ સર્કલ અને અન્ય વિસ્તારોમાં પાણી ભરાઈ ગયા. પાણીથી ભરેલા ખાડાઓએ રસ્તા પર ટ્રાફિકની સ્થિતિ વધુ ખરાબ કરી.
ભારતીય હવામાન વિભાગે અનુસાર, રવિવારે સવારે ૮.૩૦ થી સોમવારે સવારે ૫.૩૦ વાગ્યા સુધી, કોલાબામાં સૌથી વધુ ૮૮.૨ મીમી વરસાદ પડ્યો, ત્યારબાદ બાંદ્રામાં ૮૨ મીમી અને ભાયખલામાં ૭૩ મીમી વરસાદ પડ્યો. માહુલ ટાટા પાવર સ્ટેશનમાં ૭૦.૫ મીમી વરસાદ નોંધાયો, જ્યારે જુહુમાં ૪૫.૦ મીમી વરસાદ પડ્યો. સાંતાક્રુઝમાં પ્રમાણમાં ઓછો ૩૬.૬ મીમી વરસાદ પડ્યો, જ્યારે મહાલક્ષ્મીમાં ૩૬.૫ મીમી વરસાદ પડ્યો, એમ એક આઇએમડી અધિકારીએ જણાવ્યું.
