દિલ્હી અને નોઈડા સહિત સમગ્ર એનસીઆરમાં હવામાન બદલાયું છે. દિલ્હી, નોઈડા અને ગાઝિયાબાદ સહિત સમગ્ર એનસીઆરમાં ભારે પવન સાથે વરસાદ પડી રહ્યો છે. દિલ્હી અને નોઈડાના ઘણા વિસ્તારોમાં કરા પણ પડ્યા છે. આકાશને ઢાંકતા ગાઢ વાદળો દિવસ દરમિયાન અંધારું દેખાડી રહ્યા છે. અહેવાલો અનુસાર, બપોરે અચાનક આકાશ વાદળછાયું બન્યું અને પવન ફૂંકાવા લાગ્યો. બપોરે ૩ઃ૩૦ વાગ્યા પછી ભારે વરસાદ શરૂ થયો. તેનાથી રાષ્ટ્રીય રાજધાની ક્ષેત્રમાં રહેતા લાખો લોકોને ગરમીથી રાહત મળી.
તાજેતરના અહેવાલો અનુસાર, દિલ્હી અને નોઈડામાં સાંજના વરસાદ દરમિયાન કરા પડ્યા હતા. હવામાનમાં અચાનક ફેરફારથી ગરમીથી નોંધપાત્ર રાહત મળી છે. એનસીઆરમાં પણ જોરદાર પવન ફૂંકાઈ રહ્યો છે. દિલ્હીના ઘણા વિસ્તારોમાં ભારે વરસાદ પડી રહ્યો છે. આ વરસાદ વાસ્તવમાં પશ્ચિમી વિક્ષેપને કારણે થઈ રહ્યો છે.
અગાઉ, હવામાન વિભાગે આગાહી કરી હતી કે ગુરુવાર બપોરથી વાદળછાયું આકાશ રહેશે. વાવાઝોડા સાથે હળવો વરસાદ શક્ય છે. દ્ગઝ્રઇમાં ભારે પવન ફૂંકાશે. પવનની ગતિ ૩૦-૪૦ કિમી પ્રતિ કલાક સુધી પહોંચી શકે છે, બપોરે કે સાંજે ૫૦ કિમી પ્રતિ કલાકની ઝડપે ફુંકાઈ શકે છે.
હવામાન વિભાગના જણાવ્યા અનુસાર, સોનીપત, રોહતક, ખારખોડા, ચરખી દાદરી, મટ્ટનહેલ, ઝજ્જર, ફારુખનગર, કોસલી, મહેન્દ્રગઢ, સોહના, રેવાડી અને પલવલમાં વાવાઝોડા અને વીજળી (૩૦-૪૦ કિમી/કલાકની ઝડપે પવન) સાથે હળવાથી મધ્યમ વરસાદની આગાહી છે. નારનૌલ, બાવલ, નૂહ, ઔરંગાબાદ, હોડલ (હરિયાણા), બારૌત, બાગપત, મેરઠ, ખેકરા, મોદીનગર, પિલખુઆ, હાપુર, ગુલાઓથી, સિકંદરાબાદ, બુલંદશહેર, ખુર્જા (યુપી), ભીવાડી, તિજારા, ખૈરથલ, કોટપુતલી અને અલવરમાં પણ વરસાદની આગાહી છે.
એ નોંધનીય છે કે દિલ્હી-એનસીઆરમાં છેલ્લા અઠવાડિયાથી ભારે ગરમી પડી રહી છે, તાપમાન ૪૨-૪૪ ડિગ્રી સેલ્સીયસ સુધી પહોંચી ગયું છે. બુધવારે દિલ્હીમાં પણ હળવો વરસાદ પડ્યો હતો. જોકે, ગઈકાલે પડેલો વરસાદ આજ જેટલો તીવ્ર નહોતો.
