ભારતીય મૂળના બે નેતાઓએ કેનેડિયન પ્રાંત બ્રિટિશ કોલંબિયામાં મેયર પદ જીત્યા છે. ભારતીય મૂળના હર્ષણ રામદાસ ફર્નીના નવા મેયર તરીકે ચૂંટાયા છે, જ્યારે સુરિન્દરપાલ રાઠોડ વિલિયમ્સ લેકના મેયર પદ માટે ફરીથી ચૂંટાયા છે. બંને નેતાઓની જીતથી સ્થાનિક ચૂંટણીઓમાં ભારતીય મૂળના લોકોની રાજકીય ભાગીદારી ચર્ચામાં આવી છે.
બ્રિટિશ કોલંબિયામાં ૨૦૨૬ની સ્થાનિક ચૂંટણીઓ યોજાઈ હતી. મેયર અને સિટી કાઉÂન્સલરો, તેમજ પ્રાદેશિક જિલ્લા નિર્દેશકો, સ્કૂલ બોર્ડ ટ્રસ્ટીઓ અને કેટલીક અન્ય સ્થાનિક સંસ્થાઓના પ્રતિનિધિઓ માટે મતદાન થયું હતું. ચૂંટણી પરિણામો જાહેર થયા પછી હર્ષણ રામદાસ અને સુરિન્દરપાલ રાઠોડની જીતની પુષ્ટિ થઈ હતી. રામદાસે ફર્નીમાં તેમના પ્રતિસ્પર્ધી કાયલ હેમિલ્ટનને હરાવ્યા હતા, જ્યારે રાઠોડ વિલિયમ્સ લેકમાં બીજા કાર્યકાળ માટે મેયર તરીકે ચૂંટાયા હતા.
ફર્નીની મેયરની ચૂંટણીમાં ભારતીય મૂળના હર્ષણ રામદાસે ૧,૫૨૪ મત જીત્યા. તેમને કુલ મતના ૫૪.૫ ટકા મત મળ્યા, જ્યારે તેમના પ્રતિસ્પર્ધી કાયલ હેમિલ્ટનને ૧,૧૯૪ મત મળ્યા. તેમની જીત બાદ, રામદાસે કહ્યું કે ફર્નીના લોકોએ આગળ વધવાનો સ્પષ્ટ સંદેશ આપ્યો છે. તેમણે સહકાર, જવાબદારી અને શહેરના હિતોને પ્રાથમિકતા આપવાની વાત કરી. રામદાસે મતદારોના વિશ્વાસ બદલ કૃતજ્ઞતા પણ વ્યક્ત કરી.
વિલિયમ્સ લેકમાં, ભારતીય મૂળના સુરિન્દરપાલ રાઠોડ મેયર તરીકે બીજી મુદત માટે જીત્યા. તેમણે ૨,૧૧૬ મત મેળવ્યા, તેમના પ્રતિસ્પર્ધી વોલ્ટ કોબને ૧,૦૦૦ થી વધુ મતોના માર્જિનથી હરાવ્યા. તેમની જીત બાદ, રાઠોડે તેમના પરિવાર, તેમની પ્રચાર ટીમ અને શહેરના લોકોનો આભાર માન્યો. તેમણે કહ્યું કે તેઓ મેયર તરીકે લોકોની સેવા કરવાનું ચાલુ રાખવા માટે તૈયાર છે.
સુરિન્દરપાલ રાઠોડ ૧૯૭૪માં ભારતથી કેનેડા પહોંચ્યા હતા. તે સમયે તેમની ઉંમર ૨૧ વર્ષની હતી. તેમણે પહેલી વાર ૧૯૯૩માં વિલિયમ્સ લેક સિટી કાઉન્સિલ સભ્ય તરીકે ચૂંટણી જીતી હતી. મેયર બનતા પહેલા, તેમણે ૨૦ વર્ષથી વધુ સમય સુધી સિટી કાઉન્સિલર તરીકે સેવા આપી હતી. તેઓ ૨૦૨૨માં પહેલી વાર મેયર તરીકે ચૂંટાયા હતા. અગાઉ તેઓ ૨૦૧૪ અને ૨૦૧૮ની ચૂંટણીમાં વોલ્ટ કોબ સામે હારી ગયા હતા.
