ગુજરાતમાં વિવિધ વિભાગોની કામગીરીને વધુ અસરકારક બનાવવા માટે ગુજરાત વિધાનસભામાં અંદાજ સમિતિનો મહત્વપૂર્ણ અહેવાલ રજૂ કરવામાં આવ્યો છે. આ અહેવાલમાં આરોગ્ય, વન અને પર્યાવરણ સહિતના વિભાગોને લગતા ઘણા મહત્વના મુદ્દાઓ પર ધ્યાન દોરવામાં આવ્યું છે.
અહેવાલમાં આરોગ્ય વિભાગને ખાસ સૂચના આપવામાં આવી છે કે નકલી ડાક્ટરો સામે સખત પગલાં લેવાં જોઈએ. ખોટા દસ્તાવેજાના આધારે પ્રેક્ટીસ કરતા લોકોની ઓળખ કરી તેમના સામે કાનૂની કાર્યવાહી કરવી જરૂરી ગણાવવામાં આવી છે. આ પગલું લોકોના આરોગ્યની સુરક્ષા માટે ખૂબ જ મહત્વનું છે.
ખોરાકમાં ભેળસેળના મુદ્દે પણ સમિતિએ ગંભીરતા દર્શાવી છે. માત્ર તહેવારો દરમિયાન નહીં પરંતુ આખું વર્ષ ખાદ્ય પદાર્થોના નમૂનાઓ લેવામાં આવે તેવી સૂચના આપવામાં આવી છે. સાથે જ નમૂનાઓની તપાસ સમયમર્યાદામાં પૂર્ણ કરીને અસરકારક કાર્યવાહી કરવાની જરૂરિયાત પણ વ્યક્ત કરવામાં આવી છે.
વન વિભાગ માટે પણ કેટલાક મહત્વના સૂચનો આપવામાં આવ્યા છે. ગીર વિસ્તારમાં સિંહ દર્શન માટે આપવામાં આવતી ટિકિટોમાં ગડબડી અટકાવવા કડક વ્યવસ્થા કરવાની વાત કરવામાં આવી છે. ઉપરાંત, સિંહ દર્શન માટે ઉપયોગમાં લેવાતી જીપ્સીમાં સ્થાનિક લોકોને પ્રાથમિકતા આપવાની પણ ભલામણ કરવામાં આવી છે.
જંગલ વિસ્તારમાં કૂવામાં પ્રાણીઓ ખાબકી જવાના બનાવોને અટકાવવા માટે લોખંડની જાળી મૂકવાની સૂચના આપવામાં આવી છે. આ પગલાથી સિંહ સહિતના જંગલી પ્રાણીઓની સુરક્ષા વધુ મજબૂત બનશે. આ સાથે અહેવાલમાં સોલાર રૂફટોપ યોજના, સરકારી ઇમારતો પર સોલાર પેનલ લગાવવાની જરૂરિયાત અને ટ્રાન્સફોર્મર સંબંધિત મુદ્દાઓ પર પણ ધ્યાન આકર્ષવામાં આવ્યું છે.
