મધ્ય પૂર્વમાં વધતા તણાવ વચ્ચે, પીએમ નરેન્દ્ર મોદીએ એક મોટું નિવેદન આપ્યું છે. તેમણે કહ્યું, “વિશ્વમાં ચાલી રહેલા અનેક તણાવો પર ભારતનું વલણ સ્પષ્ટ છે. અમે હંમેશા શાંતિ જાળવવાની હિમાયત કરી છે. પશ્ચિમ એશિયાની વર્તમાન પરિસ્થિતિ અમારા માટે ઊંડી ચિંતાનો વિષય છે. આ સમસ્યાનો ઉકેલ વાતચીત દ્વારા લાવવો જાઈએ. અમે આ ક્ષેત્રમાં તમામ ભારતીયોની સુરક્ષા સુનિશ્ચિત કરવા માટે તમામ દેશો સાથે કામ કરવાનું ચાલુ રાખીશું.”
પીએમ મોદીએ સોમવારે પીએમ માર્ક જે. કાર્નીના નેતૃત્વમાં કેનેડા સાથેના સંબંધોમાં થયેલા વધારાને વખાણ્યો અને કહ્યું કે બંને દેશો ૨૦૩૦ સુધીમાં ૫૦ અબજ ડોલરના વેપાર સુધી પહોંચવા માટે તેમના આર્થિક સહયોગને વધુ ગાઢ બનાવવાનો પ્રયાસ કરી રહ્યા છે. આ સંદર્ભમાં, તેમણે વધુમાં જણાવ્યું કે ઓટાવા અને નવી દિલ્હીએ નજીકના ભવિષ્યમાં વ્યાપક આર્થિક ભાગીદારી કરારને અંતિમ સ્વરૂપ આપવાનો નિર્ણય લીધો છે. તેમણે સોમવારે રાજધાનીમાં કેનેડાના પીએમ માર્ક કાર્ની સાથે સંયુક્ત પ્રેસ રિલીઝ દરમિયાન આ ટિપ્પણી કરી.
પીએમ મોદીએ કહ્યું, “આજે અમે આ વિઝનને આગામી સ્તરની ભાગીદારીમાં રૂપાંતરિત કરવાની ચર્ચા કરી. અમારું લક્ષ્ય ૨૦૩૦ સુધીમાં ૫૦ અબજ ડોલરના વેપાર સુધી પહોંચવાનું છે. આર્થિક સહયોગની સંપૂર્ણ સંભાવનાને સમજવી એ અમારી પ્રાથમિકતા છે. તેથી, અમે ટૂંક સમયમાં વ્યાપક આર્થિક ભાગીદારી કરારને અંતિમ સ્વરૂપ આપવાનો નિર્ણય લીધો છે.”
પીએમ મોદીએ કહ્યું, “આ નિર્ણય બંને દેશોમાં નવા રોકાણ અને રોજગારની તકો ખોલશે. કેનેડિયન પેન્શન ફંડ્સે ભારતમાં ૧૦૦ અબજ ડોલરનું રોકાણ કર્યું છે. આ ભારતની વિકાસગાથામાં તેમના ઊંડા વિશ્વાસનું પ્રતીક છે.”તેમણે કહ્યું કે દિવસના અંતમાં, નેતાઓ વ્યાપારી સમુદાયના સભ્યો સાથે પણ મુલાકાત કરશે, જેમના સૂચનો બંને દેશો વચ્ચે આર્થિક સહયોગ માટે માળખું ઘડવામાં મદદરૂપ થશે. કેનેડાના વડા પ્રધાન માર્ક કાર્ની હાલમાં ભારતમાં છે અને પીએમ મોદીના મહેમાન છે. બંને નેતાઓએ વિવિધ મુદ્દાઓ પર ચર્ચા કરી.
દરમિયાન કેન્દ્રીય ગૃહ મંત્રાલયે રાજ્યોને એક પત્ર જારી કરીને ઈરાન પર ઈઝરાયલ-અમેરિકાના હુમલાને પગલે ભારતમાં સંભવિત હિંસા અંગે ચેતવણી આપી છે. ૨૮ ફેબ્રુઆરીના રોજ પ્રસારિત થયેલા આ પત્રમાં રાજ્યોને “ઈરાન તરફી કટ્ટરપંથી ઉપદેશકો જે ભડકાઉ ઉપદેશ આપી રહ્યા છે” ઓળખવા વિનંતી કરવામાં આવી હતી. અહેવાલો અનુસાર, ગૃહ મંત્રાલયે તમામ રાજ્યોને પત્ર લખીને મધ્ય પૂર્વ એશિયામાં ચાલી રહેલા યુદ્ધ બાદ ભારતમાં ચાલી રહેલા વિરોધ પ્રદર્શનો અંગે ચેતવણી આપી છે. આ વિરોધ પ્રદર્શનો દરમિયાન કાયદો અને વ્યવસ્થા જાળવવાની જરૂરિયાત પર ભાર મુક્યો હતો.
